بەلگىلى جۋرناليست جۇمابەك كەنجالين ومىردەن وزدى

جۇمابەك كەنجالين 1954 -جىلى قوستاناي وبلىسى، امانكەلدى اۋدانىنداعى جدانوۆ اتىنداعى كەڭشارىندا دۇنيەگە كەلگەن.

1981 -جىلى قازاق مەملەكەتتىك ۋنيۆەرسيتەتىن تامامداعان سوڭ، «سوتسياليستىك قازاقستان» («ەگەمەن قازاقستان») گازەتىندە ءتىلشى، ءبولىم مەڭگەرۋشىسى، 1986-1988 -جىلدارى «ءبىلىم جانە ەڭبەك» («زەردە») جۋرنالىندا جاۋاپتى حاتشى، باس رەداكتوردىڭ مىندەتىن اتقارۋشى بولدى.

1990 -جىلدان «حالىق كەڭەسى» گازەتى باس رەداكتورىنىڭ ورىنباسارى، ءبىرىنشى ورىنباسارى، ال 1994 -جىلدىڭ قاڭتارىنا دەيىن وسى باسىلىمنىڭ باس رەداكتورى قىزمەتىن اتقاردى. 1996-1997 -جىلدارى - «اقيقات» جۋرنالىنىڭ باس رەداكتورى، 1997-1999 -جىلدارى - «قازاق ادەبيەتى» گازەتىنىڭ باس رەداكتورى. 1999-2006 -جىلدارى «قازاق گازەتتەرى» جابىق اكسيونەرلىك قوعامىنىڭ پرەزيدەنتى، «قازاق گازەتتەرى» ج ش س- نىڭ باس ديرەكتورى، «انا ءتىلى» گازەتىنىڭ باس رەداكتورى، 2006-2009 -جىلدارى «اقيقات» جۋرنالىنىڭ باس رەداكتورى بولدى.

2009 -جىلدىڭ اقپانىنان «قازاق گازەتتەرى» ج ش س-نىڭ باس ديرەكتورى - رەداكتورلار كەڭەسىنىڭ ءتوراعاسى قىزمەتىن اتقارعان ەدى. قازاقستان ۇكىمەتى جانىنداعى مەملەكەتتىك تەرمينولوگيالىق كوميسسيا مۇشەسى، الماتى قالالىق كەڭەسىنىڭ دەپۋتاتى بولىپ سايلانعان. 2004 -جىلى كانديداتتىق ديسسەرتاتسيا قورعاپ، ساياساتتانۋ عىلىمدارىنىڭ كانديداتى عىلىمي دارەجەسىن العان.

«جەلكىلدەپ وسكەن قۇراقتاي»، (1988، «ونەر»)، «شىندىقتى شىراق ەتىپ ۇستاڭىز» (1998، «قازاقستان»)، «ۇلت رۋحىن ۇلىقتاعان ۇرپاقپىز» (2005، «ولكە») دەپ اتالاتىن دەرەكتى اڭگىمەلەر مەن ەسسەلەر كىتاپتارىنىڭ اۆتورى.

قازاقستان جۋرناليستەر وداعى سىيلىعىنىڭ لاۋرەاتى (1984)، قازاقستان رەسپۋبليكاسى پرەزيدەنت سىيلىعىنىڭ لاۋرەاتى (2006)، ق ر مادەنيەت جانە اقپارات مينيسترلىگىنىڭ «مادەنيەت قايراتكەرى» بەلگىسىمەن ماراپاتتالعان (2004). قازاقستان جۋرناليستەر اكادەمياسىنىڭ تولىق مۇشەسى - اكادەميگى (2001).

اۆتور: مارلان جيەمباي