شري-لانكا تەڭىزشىلەرى اشىق تەڭىزگە اعىپ كەتكەن ەكى ءپىلدى قۇتقاردى - كەسكىن

قۇتقارۋ وپەراتسياسىنا بىرنەشە قايىققا مىنگەن ونشاقتى ادام قاتىستى. پىلدەردىڭ سۋعا تۇنشىعىپ قالماۋىن سۇڭگۋىرلەر باقىلادى. تەڭىزشىلەر جانۋارلاردى ارقاندارمەن بايلاپ جاعالاۋعا سۇيرەدى. ارتىنشا پىلدەر قالىڭ ورمانعا كىرىپ كەتتى.

اتاپ وتكەن ءجون، بۇل سوڭعى ءبىر جارىم اپتا ىشىندەگى شري-لانكا اسكەري تەڭىز كۇشتەرىنىڭ جابايى پىلدەردى قۇتقارۋعا قاتىسقان ەكىنشى وقيعا. وتكەن جولى ولار جاعالاۋدان شامامەن سەگىز شاقىرىمداي قاشىقتىقتا اعىپ بارا جاتقان تاعى ءبىر ءپىلدى قۇتقارعان بولاتىن. ونىڭ ءومىرى ءۇشىن تەڭىزشىلەر 12 ساعات ايقاستى.