استانادا قاعاز جينايتىن ارنايى قوقىس جاشىكتەرى ورناتىلادى

«بۇگىندە استانا قالاسىنىڭ اكىمدىگىمەن قوقىستاردى ءبولىپ جيناۋ جۇيەسىن ەنگىزۋ بويىنشا قارقىندى جۇمىس جۇرگىزىلۋدە. حالىق بۇل باستامانى ءاۋ باستان-اق قولدادى. بۇل باعىت شەڭبەرىندە جىل سوڭىنا دەيىن قاعازداردى جيناۋ ءۇشىن 700 ارنايى قوقىس جاشىكتەرىن ورناتۋ جوسپارلانۋدا»، - دەيدى قالا اكىمدىگى تابيعي رەسۋرستار جانە تابيعاتتى پايدالانۋدى رەتتەۋ باسقارماسى ءبولىمىنىڭ باسشىسى ميراس عايسين.

وعان قوسا، ەلوردادا ەلەكتر جارىعىن ۇنەمدەيتىن قۇرامىندا سىناپ بار شامداردى جيناۋ جانە جويۋ بويىنشا جوبالار ىسكە اسىرىلۋدا. بۇگىندە استانادا بۇنداي كونتەينەرلەردىڭ 700 دەن استامى ورناتىلدى.

ءارى قاراي ءوندىرۋ ءۇشىن بۇل شامدار تاماق قالدىقتارىنان بولەك جينالىپ، سۇرىپتالىپ ارنايى سارعىلت ءتۇستى جاشىكتەرگە سالىنادى. ءوز كەزەگىندە سارى ءتۇستى قوقىس جاشىكتەرى پلاستيك قالدىقتارىنا ارنالعان. قازىرگى ۋاقىتتا تۇرعىن- ۇيلەردىڭ اۋلالارىندا بۇنداي كونتەيلەردەرىڭ 600 دەن استامى بار. بارلىق جينالعان پلاستيك ءارى قاراي ءوندىرۋ ءۇشىن قوقىس ءوندىرۋ زاۋىتىنا جونەلتىلەدى. قالدىقتار سۇرىپتالىپ، بريكەتتەلەدى.

«كورىپ تۇرعانداي، بۇل كونتەينەرلەر كۇن سايىن تولادى. قالا تۇرعىندارى مەن قوناقتارى بۇل جوبانى قولداپ، ەلوردانىڭ ەكولوگيالىق احۋالىن جاقسارتۋعا ءوز ۇلەستەرىن قوسادى دەگەن سەنىمدەمىز»، - دەدى م. عايسين.

اكىمدىكتىڭ مالىمەتتەرى بويىنشا، قازىرگى ۋاقىتتا ەلوردا اۋماعىندا 9 مىڭنان استام ءتۇرلى قوقىس جاشىكتەرى ورناتىلعان. بۇعان دەيىن اكىمدىكتىڭ مەديا ورتالىعىنان حابارلانعانداي، استانادا ماۋسىم ايىندا تۇرمىستىق قاتتى قالدىقتاردى سىرتقا شىعاراتىن كومپانيا اۋىستى.

«استانا- تازارتۋ» كومپانياسىنىڭ ورنىنا ارنايى بازاسى مەن تەحنيكاسى بار «Clean City NC»  ج ش س كەلدى.