نۇرلان نوعايەۆ: جاس ۇرپاق ءوز ۇلتتىق ويىندارىن ءبىلۋى قاجەت
بۇدان بۇرىن حابارلانعانداي، استانادا اتىراۋ وبلىسىنىڭ كۇندەرى اياسىندا ات جارىسى وتكەن. وبلىس اكىمى نۇرلان نوعايەۆتىڭ ايتۋىنشا، 16-20 - شىلدە ارالىعىندا مادەنيەت كۇندەرى باعدارلاماسىن وتكىزۋ ۋاقىتىندا اتىراۋ وڭىرىنەن كەلگەن ۇيىمداستىرۋشىلار ولكەنىڭ جەتىستىگى، ونىڭ وتكەنى مەن تۇرعىندارى ماقتان تۇتاتىن قازىرگى ەرەكشەلىكتەرىن كورسەتە الدى.
«قازاقستان استاناسىندا ەكسپو حالىقارالىق كورمەسىن وتكىزۋ - ەلدىڭ ەڭ اۋقىمدى جەتىستىكتەرىنىڭ ءبىرى، بۇل مەملەكەت باسشىسىنىڭ وراسان ەڭبەگى. وسكەلەڭ ۇرپاق ءوز ۇلتتىق ويىندارىن ءبىلۋى ماڭىزدى. سوندىقتان دا مادەنيەت كۇندەرىن بايگە جارىسىمەن اياقتاۋدى ءجون سانادىق»، - دەدى اكىم نۇرلان نوعايەۆ.
ەسكە سالساق، قاتىسۋشىلار ءۇش تارتىپتە جارىسقا ءتۇستى. 5 شاقىرىم - جورعا جارىس، 7 شاقىرىم - قۇنان بايگە، 21 شاقىرىم - الامان بايگە. قازاقستاننىڭ ءار وبلىسىنان، استانا مەن الماتى قالالارىنان 3 تۇلپاردان قاتىستى. اتىراۋ وبلىسى جارىس يەسى رەتىندە 9 جۇيرىگىن قوسا الدى.
مادەنيەت جانە سپورت ءمينيسترى ارىستانبەك مۇحامەدي ۇلى، اقپارات جانە كوممۋنيكاتسيالار ءمينيسترى داۋرەن ابايەۆ، استانا اكىمى اسەت يسەكەشوۆ، اتىراۋ وبلىسىنىڭ اكىمى نۇرلان نوعايەۆ جەڭىمپازدارعا مەدال، ديپلوم، اقشالاي جۇلدەلەر تابىستادى.
الامان بايگەگە 62 تۇلپار قاتىستى. مارەگە الماتىلىق دياس جۇماش ءبىرىنشى بولىپ جەتتى. ونىڭ «توسقىن» اتتى سايگۇلىگى 2014 -جىلدان بەرى جارىسقا قاتىسىپ كەلەدى. بيىل 6 جۇلدەلى ورىن يەلەنگەن. بالانىڭ اكەسىنىڭ ايتۋىنشا، ۇلى ءار كەز ءبىرىنشى بولىپ كەلەدى. ن. نوعايەۆ جەڭىمپازعا 13 ميلليون تەڭگەنىڭ سەرتيفيكاتىن تاپسىردى. ەكىنشى ورىن استانالىق ەربول زامۋدينگە بۇيىردى - 7 ميلليون تەڭگە ءۇشىنشى ورىندى پاۆلوداردىق يبراگيم بوبەكباي الدى (5 ميلليون تەڭگە). 4- ءشى جانە 5- كەلگەندەرگە 2 ميلليون تەڭگەدەن بەرىلدى. جۇلدە قورى دەمەۋشىلەر قاراجاتىنان جينالعانىن اتاپ وتكەن ءجون. 5 شاقىرىمعا دەيىن قاشىقتىقتا ايحان تولەگەنوۆ جەڭىسكە جەتسە، قۇنان بايگەدە جولاۋشى دىلمۇحامەت ءبىرىنشى كەلدى.
«نوماد» توبىنىڭ تەاترلاندىرىلعان كورىنىسى كەشتىڭ كوركىن كىرگىزدى، وندا كاسكادەرلار ونەر كوسەتتى. ۇلتتىق بايگە جارىسى، قىز قۋۋ، ساداق اتۋ، ت. ب. كورسەتىلىمدەر قويىلدى.
