بەلارۋستە «قارا» ريەلتورلار ءولىم جازاسىنا كەسىلدى

بۇل اتىشۋلى ءىس بويىنشا سوت تالقىلاۋى سەگىز ايعا سوزىلدى. ولاردىڭ ءارقايسىسىنا قىلمىستىق كودەكستىڭ بىرنەشە باپتارى بويىنشا ايىپ تاعىلدى. ولاردىڭ ىشىندە التى ادامدى ءولتىرىپ، تاعى ءۇش ادامدى ولتىرۋگە دايىندالۋ، ادام ۇرلاۋ، ۇرلاۋعا دايىندالۋ، سونداي-اق الاياقتىق، قاراقشىلىق، بوپسالاۋ، زاڭسىز كاسىپكەرلىك قىزمەت بار.

ءمان-جايدى جان-جاقتى، تولىقتاي، وبەكتيۆتى زەرتتەگەننەن كەيىن باس فيگۋرانت يگور گەرشانكوۆ پەن ونىڭ سىبايلاسى سەمەن بەرەجنوي ەڭ اۋىر جازا - ءولىم جازاسىنا كەسىلدى. ونىڭ جۇبايى تاتياناعا سوت جالپى رەجىمدەگى كولونيادا جازاسىن وتەۋمەن 24 جىلعا باس بوستاندىعىنان ايىرۋ، بوريس كولەسنيكوۆكە - قاتاڭ رەجىمدەگى كولونيادا 22 جىلعا باس بوستاندىعىنان ايىرۋ جازاسى تاعايىندالدى. قىلمىس 2009-2015 -جىل ارالىعىندا جاسالعان. ولار جالعىز ازاماتتار مەن ىشىمدىككە سالىنعانداردى تاڭداعان. ولاردىڭ ماتەريالدىق جاعدايلارىنىڭ اۋىر ەكەندىگىن پايدالانعان ايىپتالۋشىلار ولاردى پاتەرلەرىن ساتۋعا كوندىرىپ، ورنىنا جاڭا ءۇي ساتىپ الۋعا كومەكتەسۋگە ۋادە بەرگەن. مامىلەدەن كەيىن كليەنتتەردى ءولتىرىپ، الدىن الا قازىلعان جەرگە كومىپ وتىرعان.