قازاقستانعا قىتايلىق تۋريستەردى كوپتەپ تارتۋىمىز قاجەت - ۆيتسە- مينيستر باتالوۆ

استانا. قازاقپارات - بۇگىندە شەتەلگە شىعاتىن تۋريستەردىڭ سانى جاعىنان قىتاي حالىق رەسپۋبليكاسى كوش باستاپ تۇر.

اسپاناستى ەلىنىڭ 150 ميلليونعا جۋىق ازاماتى الەمدى ارالاعاندا شامامەن 280 ميلليارد دوللار جۇمساعان، دەپ حابارلايدى قازاقپارات ءتىلشىسى.

«سول سەبەپتى بىزگە قىتايلىق تۋريستەردى كوپتەپ تارتۋ قاجەت. ولار ءۇشىن ارنايى تۋريستىك باعىتتاردى ازىرلەگەن دۇرىس دەپ ويلايمىن»، - دەدى ق ر مادەنيەت جانە سپورت ۆيتسە-ءمينيسترى اسقار باتالوۆ بۇگىن تۋريستىك سالانى دامىتۋعا ارنالعان جيىندا.

ونىڭ ايتۋىنشا، وتكەن جىلى قازاقستانعا 117 مىڭ قىتايلىق تۋريست كەلىپ كەتكەن. بۇل ەلىمىزگە كەلگەن تۋريستەردىڭ 10 پايىزى. قالعان 90 پايىزى - رەسەي، قىرعىزستان، وزبەكستان سياقتى جاقىن كورشىلەر.

«ءبىزدىڭ نەگىزگى ماقساتىمىز - 2025-جىلعا دەيىن قازاقستانعا كەلەتىن تۋريستەردىڭ جالپى سانىن 7 ميلليونعا جەتكىزۋ. وسى ورايدا تۋريستەر ءۇشىن ۆيزاعا قۇجات تاپسىرۋدىڭ ەلەكتروندى جۇيەسىن دايارلاۋ جۇمىسى باستالدى. بۇدان بولەك، ءبىز قازاقستان ارقىلى ترانزيتپەن وتەتىن يران مەن ءۇندىستان ازاماتتارى ءۇشىن 72 ساعاتقا دەيىنگى ۆيزاسىز رەجيمدى ەنگىزۋ جوباسىن دايىنداپ قويدىق»، - دەپ اتاپ كورسەتتى باتالوۆ.

ايتا كەتەيىك، بۇگىنگى تاڭدا قىتاي ازاماتتارى ءۇشىن 72 ساعاتقا دەيىنگى ۆيزاسىز رەجيم ەنگىزىلگەن. اتالعان باستاما ەكسپو كورمەسى اياسىندا پيلوتتىق جوبا رەتىندە قولعا الىنىپ وتىر. وعان سايكەس، استانا مەن الماتى اۋەجايلارى ارقىلى باسقا ەلدەرگە ۇشىپ بارا جاتقان قىتايلىق تۋريستەر قازاقستاندا ءۇش كۇن بويى ۆيزاسىز جۇرە الادى.