استانادا قازاق تەاترى سالىنادى

استانا. قازاقپارات - استانادا قازاق تەاترىنىڭ قۇرىلىسى جوسپارلانۋدا.

بۇل تۋرالى فەيسبۋكتە قالا باسشىسىنىڭ باسپا ءسوز حاتشىسى ەلۆيرا جۇرگەنبايەۆا جازدى.

«ەلوردامىزدا قازاق تەاترى سالىنباق. بۇل استانا قالاسى اكىمدىگىنىڭ ەلباسى جاريالاعان «بولاشاققا باعدار: رۋحاني جاڭعىرۋ» ماقالاسىن ىسكە اسىرۋداعى جوبالارىنىڭ ءبىرى عانا»، - دەپ جازدى ول.

ول قازاقپارات تىلشىسىنە جاڭا تەاتردىڭ استانا اكىمدىگىنىڭ قاتىسۋىمەن وتكەن جينالىستا ۇسىنىلعانىن ناقتىلاپ ايتتى.

«اكىم پرەزيدەنت ماقالاسىن جۇزەگە اسىرۋ بويىنشا ناقتى تاپسىرمالار بەردى. ءار باسقارما ءوز جوباسىن تانىستىردى. بۇل - كوپ جوبانىڭ ءبىرى عانا. مۇنداي جوبالار جاستار، ءبىلىم بەرۋ سالالارىندا وتە كوپ ۇسىنىلدى»، - دەپ اتاپ ءوتتى ول.

ەلوردانىڭ مادەنيەت باسقارماسىنىڭ سايتىندا جاريالانعان دەرەگى بويىنشا، استانادا قازىرگى تاڭدا التى تەاتر بار.