الماتى وبلىسىنىڭ اكىمى جەتىسۋلىق جاستارمەن بىرگە ءان سالدى
كەزدەسۋ بارىسىندا الماتى وبلىسىنىڭ جاس وكىلى ماعجان ىسقاقوۆ گوللانديالىق ادىسپەن جاسالعان بيولوگيالىق جەمنىڭ ماڭىزى تۋرالى جوباسىن ازىرلەگەنى ءۇشىن 2 ميلليون 600 مىڭ تەڭگە، جاس اعاشتى تامىرلاندىراتىن قۇنارلى قوندىرعى جاساۋ جوباسى ءۇشىن بەرلىعوجا جىگەر 800 مىڭ تەڭگە، ەلەكتر ۇنەمدەگىش ەلەكتر پەشى جوباسىن دايىنداعان شىڭعىس نۇرعوجايەۆ 700 مىڭ تەڭگە گرانتقا يە بولعاندىعى ايتىلدى.
ماراپاتتالعاندار اراسىندا جەتىسۋلىق جاستاردىڭ قىمىز وندىرىسىنە، توسپا سۋدى تازارتۋعا قاتىستى جوبالارى دا بار. بۇل تۋرالى بۇگىن الماتى وبلىسىنىڭ اكىمى اماندىق باتالوۆتىڭ ءوڭىر جاستارىمەن كەزدەسۋى بارىسىندا بەلگىلى بولدى، دەپ حابارلايدى وبلىس اكىمىنىڭ باسپا ءسوز قىزمەتى.
اتاپ وتسەك، وبلىس اكىمدىگى بەس جىلدان بەرى جاستار اراسىندا «VIP» عىلىمي جوبالارىنىڭ بايقاۋىن وتكىزىپ كەلەدى. بايقاۋدىڭ ماقساتى - جاستاردى يننوۆاتسيالىق جوبالار دايىنداۋعا تارتۋ، جاس عالىمداردى ىنتالاندىرۋ، الەۋمەتتىك ماڭىزى زور وزىق جوبالارعا قولداۋ كورسەتۋ. بۇل بايقاۋ بيىل دا جالعاسىن تاۋىپ، جەڭىمپاز اتانعان بەس جاس عالىمدارعا گرانتتار تالعار اۋدانىنداعى «لەسنايا سكازكا» تۋريستىك كەشەنىندە وتكەن كەزدەسۋدە تابىستالدى. كەزدەسۋگە جالپى سانى جۇزگە جۋىق جاس قاتىستى. شاقىرىلعاندار قاتارىندا جاس عالىمدار، سپورتشىلار، كوپبالالى جاس وتباسىلاردىڭ مۇشەلەرى، «جاس وتاۋ» بايقاۋىنىڭ جەڭىمپازدارى، جاس كاسىپكەرلەر جانە باسقا دا بەلسەندى جاستار بار. جاستارمەن ەركىن پىكىر الماسقان وبلىس اكىمى اماندىق باتالوۆ وڭىردە اتقارىلىپ جاتقان جۇمىستاردىڭ باسىم باعىتتارى تۋرالى ايتىپ بەردى.
سونىمەن قاتار اكىم سوزىندە مەملەكەتتىك جاستار ساياساتىن جۇزەگە اسىرۋ بارىسىنا توقتالىپ، «جۇمىسپەن قامتۋ جول كارتاسى - 2020»، «بيزنەستىڭ جول كارتاسى - 2020»، «ديپلوممەن - اۋىلعا!»، «بولاشاق»، «سەرپىن - 2050»، «جاسىل ەل» سياقتى جوبالاردىڭ جاستار ءۇشىن ۇلكەن مۇمكىندىكتەرگە جول اشىپ وتىرعانىن ايتتى.
«مەملەكەت باسشىسى جاستار ماسەلەسىنە ەرەكشە نازار اۋدارادى. ءبىزدىڭ الدىمىزعا قويىپ وتىرعان ۇلكەن مىندەتتەردىڭ ءبىرى دە - وسى جاستار ساياساتىن ناتيجەلى جۇزەگە اسىرۋ. جاس وركەننىڭ وقۋىنا، جۇمىس ىستەۋىنە جاعداي جاساۋ، باستامالارىن قولداۋ، باعىت كورسەتۋ - ءبىزدىڭ پارىزىمىز. بۇگىنگى كەزدەسۋدە وزدەرىڭمەن ەركىن اڭگىمەلەسىپ، وي بولىسسەك دەگەن نيەتتەمىن. ارالارىڭدا ەل ەسىمىن ەرەكشە ماقتانىشپەن ايتاتىن مىقتى جاستار كوپ. سەندەردىڭ تىڭ ويلارىڭ، جالىن جۇرەكتەرىڭ، جىگەرلى ىستەرىڭ مەملەكەتىمىز ءۇشىن اسا قاجەت، - دەدى ا. باتالوۆ.
بۇدان ءارى ءوڭىر باسشىسى الەۋمەتتىك- ەكونوميكالىق دامۋ ماسەلەلەرىمەن قاتار جاستاردىڭ ماماندىق تاڭداۋ، بالا تاربيەسى سەكىلدى ەركىن تاقىرىپتاعى ساۋالدارىنا جاۋاپ بەردى. جاستار تاراپىنان اۋىلدىق جەرلەردە اۋلا كلۋبتارىن دامىتۋ، وبلىس ورتالىعىندا ميۋزيكل تەاترىن قۇرۋ سياقتى ءبىرقاتار ۇسىنىستار ايتىلىپ، ۇسىنىستار قولداۋ تاپتى. كەزدەسۋ سوڭىندا ا. باتالوۆ جاستارمەن بىرگە ءان سالىپ، ەستەلىك سۋرەتكە ءتۇستى. ءسوزىنىڭ قورىتىندىسىندا وبلىس باسشىسى ءاردايىم بەلسەندى جاستارعا قولداۋ كورسەتىپ، مارگينالدى جاستاردى قوعامدىق ورتاعا تارتۋعا جاعداي جاسايتىندىعىن ايتتى. جانە وسىنداي كەزدەسۋدى جىل سايىن ءداستۇرلى تۇردە وتكىزۋ ۇيعارىلىپ، كەلەسى جۇزدەسۋ تالدىقورعان وڭىرىندەگى قورا شاتقالىندا، بۇرحانبۇلاق سارقىراماسى ماڭىندا ۇيىمداستىرىلاتىن بولدى. كەزدەسۋدەن كەيىن جاستار كوماندالارى اراسىندا ۆولەيبولدان جولداستىق كەزدەسۋ ءوتتى.
جالپى الماتى وبلىسىندا 4 مىڭنان استام جاس بار، ياعني ولار حالىقتىڭ ۇشتەن ءبىر بولىگىن قۇراپ وتىر. وسىدان ءۇش جىل بۇرىن وبلىستىق جاستار ساياساتى باسقارماسىنىڭ بيۋدجەتى 70 ميلليون تەڭگە كولەمىندە بولسا، بيىل بۇل كورسەتكىش 550 ميلليون تەڭگەگە جەتتى. وسى جىلى جاستاردىڭ الەۋمەتتىك ماڭىزدى جوبالارىنىڭ بايقاۋىنا 31 ميلليون تەڭگە بولىنگەن. سونداي- اق حالىقارالىق قايتا قۇرۋ جانە دامۋ بانكى مەن ق ر ءبىلىم جانە عىلىم مينيسترلىگىنىڭ جاستار كورپۋسىن دامىتۋ بىرلەسكەن جوباسىن جۇزەگە اسىرۋ شەڭبەرىندە وبلىس جاستارىنىڭ 233 جوباسى گرانت ۇتىپ الدى.
