كەلەر جىلى وزبەكستاندا انالوگتىق تەلەحابار تاراتۋ توقتاتىلادى

 ەلدىڭ مينيسترلەر كابينەتى وسىنداي قاۋلى قابىلدادى. انالوگتىق سيگنال تاراتۋدىڭ توقتاۋى كەزەڭ- كەزەڭمەن جۇرگىزىلەدى، ول ارنايى كەستەدە بەلگىلەنگەن. مىسالى، انالوگتىق سيگنال تاشكەنت قالاسىندا 2018 -جىلدىڭ 15 - شىلدەسىندە وشىرىلەدى، ال رەسپۋبليكا بويىنشا بۇل شارا سول جىلدىڭ 5 - جەلتوقسانىندا جۇزەگە اسىرىلادى.

 وزبەكستاندا سيفرلىق تەلەحابار تاراتۋ ءۇشىن تەگىن تەلەارنالاردىڭ جيىنتىعى قالىپتاستىرىلعان. قازىر وعان ۇلتتىق تەلەراديوكومپانيا قاتارىنا كىرەتىن 13 كانال قامتىلعان. اتاپ ايتار بولساق «وزبەكستان»، «يەشلار» ، «سپورت»، «كينوتەاتر» ، UZ HD جانە باسقالارى. سونداي- اق وعان جەكەمەنشىك 7 تەلەارنا كىرەدى - Mening Yurtim, Caravan TV، UzReport TV، FUTBOL TV، Milliy TV.

«انالوگتىق حابار تاراتۋ ۇدەرىسى جەڭىل ءوتۋى ءتيىس. ويتكەنى، از قامتىلعان وتباسىلار مەن زەينەتكەرلەرگە سيفرلىق تەلەحابار تاراتۋ سيگنالىن قابىلداۋ ءۇشىن قاجەتتى قۇرىلعىلار مەن تەلەديدار ساتىپ الۋىنا بانكتەردەن جەڭىلدەتىلگەن نەسيە بەرىلەدى»، - دەيدى ۇكىمەتتەگى اقپارات بەرۋشى شەنەۋنىك.

قۇرال- جابدىقتاردىڭ باعاسىن ارزانداتۋ ءۇشىن «ءوزەل تەحسانوات» كومپانياسىنا الداعى بەس جىل ىشىندە 3 ميلليون سيفرلىق تەليەۆيزيالىق قابىلداعىشتار شىعارۋ جۇكتەلگەن. ەسكە سالا كەتسەك، قىرعىزستاندا بيىل 15 -مامىردان باستاپ انالوگتىق حابار تاراتۋ اجىراتىلعان بولاتىن.