جامبىل وبلىسىنداعى «ايشا ءبيبى» پوليگونىندا وق- دارىلەر جويىلۋدا

تاراز. قازاقپارات - الەۋمەتتىك جەلىلەردە بىرنەشە كۇننەن بەرى تاراز تۇرعىندارى قايتا- قايتا ەستىلىپ جاتقان جارىلىس ۇنىنە الاڭداۋشىلىق بىلدىرۋدە، ءتىپتى ۇيلەردىڭ قابىرعالارى دا قوزعالاتىن جاعدايلار بولعان،

 دەپ حابارلادى «قازاقپارات» ح ا ا ءتىلشىسى.

«وڭتۇستىك» وڭىرلىك قولباسشىلىعىنداعىلاردىڭ ايتۋىنشا، الاڭداۋعا ەش سەبەپ جوق. وبلىس ورتالىعىنان 20 شاقىرىمداعى «ايشا ءبيبى» وقۋ- جاتتىعۋ پوليگونىندا جارۋ جۇمىستارى ءجۇرىپ جاتىر، وق- دارىلەر جويىلۋدا»، - دەپ حابارلادى «وڭتۇستىك» ءو ق باسپا ءسوز قىزمەتىنىڭ باسشىسى دينا مۋحارينوۆا.

ونىڭ ايتۋىنشا، بۇگىندە وقۋ ورتالىعى سانالاتىن پوليگوندا قارۋدىڭ ءار تۇرىنەن ءتۇرلى اتىس ۇيىمداستىرىلادى. بۇل رەتتە الاڭدا وق- دارىلەر قالىپ قويادى. ارنايى پوليگون كومانداسى اتىس اياقتالعاننان كەيىن الاڭدى تازالايدى، سناريادتار تابىلعان جاعدايدا ولاردى جيناپ، جوسپارلى تۇردە جويادى.

«بۇل جۇمىس تۇراقتى تۇردە جۇرگىزىلەدى. سوڭعى كۇندەرى جەل باعىتى وزگەردى، سوندىقتان دا قالالىقتارعا سەزىلىپ جاتىر، تاياۋدا بۇل جۇمىستار اياقتالادى»، - دەپ ءتۇسىندىردى دينا مۋحارينوۆا.

«وڭتۇستىك» ءو ق قولباسشىلىعىندا پوليگون كومانداسى تاۋلىك بويى جاۋىنگەرلىك كەزەكشىلىكتە اۋماقتى كۇزەتەتىنىن ايتتى.