ءۇشارال قالاسىندا جاڭا اۋەجاي اشىلادى
«دوستارىم، جاعىمدى جاڭالىقپەن بولىسكىم كەلىپ وتىر. 21 - شىلدە كۇنى الاكولدىڭ جانىنداعى ءۇشارال قالاسىندا اۋەجاي اشىلاتىن بولدى! بۇل، ارينە، تۋريستەر سانىنىڭ ۇلعايۋىنا ىقپال ەتەتىنى ءسوزسىز»، - دەپ جازدى ا. مۇحامەدي ۇلى.
سونىمەن بىرگە، مينيستر دەمالىس كۇندەرى الاكول جاعاسىندا دۋاتلوننان جارىس وتكىزگەندەرىن ەسكە سالدى جانە قازاقستاندىق كۋرورتتاردىڭ جارناماسىمەن جۇمىس ىستەۋ قاجەتتىگىن باسا ايتتى.
«قازاقستاننىڭ كەرەمەت سۇلۋ تابيعاتىن ناسيحاتتاپ، الاكول سياقتى ايدىنىمىزدى ماقتان تۇتۋىمىز كەرەك. بۇل جەردە كەڭ تىنىس الىپ، سپورتپەن اينالىسۋعا تالپىنىس تۋادى ەكەن. سول سەبەپتى سپورتتى ناسيحاتتاۋ جانە تۋريستەردى تارتۋ ماقساتىندا دۋاتلوننان جارىستى جىلدا وتكىزەتىن بولىپ شەشتىك. ءدال سونداي ءىس- شارانى كولدىڭ شىعىس قازاقستان وبلىسىنداعى جاعالاۋىندا وتكىزۋدى جوسپارلاپ وتىرمىز»، - دەدى ول.
سونداي- اق، ا. مۇحامەدي ۇلىنىڭ حابارلاۋىنشا، ق ر مادەنيەت سپورت ءمينيسترىنىڭ ورىنباسارى اسقار باتالوۆ تۋريستىك وپەراتورلارمەن الاكولدىڭ تۋريستىك پروتسەسسىن جانداندىرۋ تاقىرىبىندا سەمينار وتكىزدى. «ارينە، سىرتتا وتكىزىلەتىن سەمينارلار پارمەندىرەك، ماسەلەنى الىستاعى استانادان شەشۋ كەيدە قيىنداۋ سوعادى. ءبىز كول جاعاسىنداعى قۇرىلىس نىساندارىن تەكسەرىپ، قولىمىزداعى مالىمەتتەرمەن سالىستىردىق، ەندى كۋرورت ايماعىن دامىتۋ جۇمىستارىن ناقتىلاۋدى جوسپارلاپ وتىرمىز. ۇكىمەتتىڭ تۋريزم سالاسىن دامىتۋ تۋرالى كونتسەپتسيامىزدى قولداۋى - ىشكى تۋريزمنىڭ جوعارى دەڭگەيگە كوتەرىلۋىنىڭ كەپىلى دەپ بىلەمىز»، - دەپ تۇيىندەدى مينيستر.
اۆتور: ايجان سەرىكجان قىزى
