وتباسىما ماسىل بولعىم كەلمەدى - پاراليمپيالىق سپورتشى سەرىك ەسماتوۆ - كەسكىن

الماتى. قازاقپارات - پاراليمپيالىق سپورتشى سەرىك ەسماتوۆ «مەن ءوزىم ويلاعاننان دا كۇشتىمىن» موتيۆاتسيالىق روليگىن ءتۇسىردى.

سپورتشى قازاقپارات تىلشىسىنە سپورتقا دەگەن ىنتاسىن قالاي ساقتاپ قالعانىن ايتىپ بەردى. پاراليمپيالىق سپورتشىلار ءۇشىن ءومىردىڭ ءار كۇنى كۇرەس ەكەندىگى بەلگىلى. ال سايىسقا شىعۋ ودان دا قيىن. ءتىپتى جاتتىعۋدىڭ وزىنە ءارقاشان اۋرۋمەن، قوعامنىڭ سىڭارجاق پىكىرىمەن، ءوزىنىڭ ىشكى سەنىمسىزدىگىمەن كۇرەسۋگە تۋرا كەلەدى.

سەرىك ەسماتوۆ بالا كەزىنەن سپورتتى جاقسى كورەتىن. 10 جاسىندا ونى اعالارى ارمان مەن ايان سپورتقا تارتقان.

«مەن ءار سپورت تۇرىمەن اينالىسىپ كوردىم. سونىڭ ىشىندە بوكس، ءجۇزۋ، ۆەلوسپورتتا جاقسى ناتيجە كورسەتتىم. ۇلكەن سپورتتا جۇلدىز بولۋدى ارماندادىم. ءبىراق 13 جاسىمدا قاپەلىمدە اياعىمنان ايرىلىپ قالدىم. سوندا دا ەرىك-جىگەرىمدى قايراپ ارمانىما جەتۋگە تىرىستىم. ارمانىم مەنى پاراليمپيالىق سپورتقا اكەلدى»، - دەدى سەرىك ەسماتوۆ.

بارلىق پاراليمپيالىقتار سياقتى سەرىك تە باسىنان وتكەن قايعىلى جاعداي تۋرالى ايتقىسى كەلمەيدى. وتكەندى ۇمىتىپ، تاعدىرىنا مويىنسۇنعان سەرىك ەندى تەك العا ۇمتىلا باستايدى.

ءبىر جىل ىشىندە سەرىك اربامەن ۆولەيبول ويناي باستايدى. باسىندا وتباسىنا ماسىل بولماۋ ءۇشىن وڭالتۋ ماقساتىندا اينالىسا باستاعان. 4 اي ىشىندە باپكەرلەر سەرىكتىڭ سپورتتاعى ناتيجەلەرىن بايقاي باستايدى. وسىلايشا ول اربامەن ۆولەيبولدان قازاقستاننىڭ جاستار قۇراماسىنىڭ مۇشەسى اتاندى.

2013-جىلدىڭ قازانىندا كوماندا مالايزيادا وتكەن ازيا جاستار پاراويىندارىندا قولا مەدالگە قول جەتكىزەدى. قازىر سپورتشى الەمدىك سپورت دودالارىنا قاتىسىپ، التىن الۋدى، قازاقستاننىڭ مەرەيىن ارتتىرۋدى ارمانداپ ءجۇر.

«ەكى اياعىڭ جوق بولسا سپورتپەن اينالىسۋ وڭاي ەمەس. ەڭ الدىمەن ءوزىڭنىڭ قورقىنىشىڭدى، سەنىمسىزدىگىڭدى جەڭە ءبىلۋ كەرەك. سونداي-اق، بارلىق زالدار مۇگەدەكتەرگە ىڭعايلى جاسالماعان. مەن اياعىما ۋاقىتشا بولسىن پروتەز كيىپ جۇرە الامىن. ال كەيبىر مۇگەدەكتەر ولاي ەتە المايدى. ارباعا مۇلدە تاڭىلعاندار بار»، - دەدى س. ەسماتوۆ.

قازاقستان ۇلتتىق پاراليمپيالىق كوميتەتى پاراليمپيالىق سپورتشىلارعا «مەن ءوزىم ويلاعاننان دا كۇشتىمىن» بەينەروليگىن ءتۇسىرۋ تۋرالى ءۇي تاپسىرماسىن بەرگەن بولاتىن.

سپورتشىلار روليكتە وزدەرى تۋرالى وقيعانى ايتىپ بەرەدى. «پاراليمپيالىق قۇرامانىڭ اتلەتتەرىنە وسىنداي تاپسىرما بەردى. مەن وسى تاقىرىپتا ۆيدەو ءتۇسىرۋدى ۇيعاردىم. وعان دوستارىم كومەكتەستى. ءماتىن جازۋعا دوسىم ديدار كۋشامانوۆ قول ۇشىن سوزدى. روليكتە جاتتىعۋ پروتسەسىن كورسەتتىك، يمپروۆيزاتسيالىق ساتتەر دە بار»، - دەدى ول.

ايتا كەتۋ كەرەك، وسىعان دەيىن ءوزىنىڭ تاريحىن پاراليمپيالىق سپورتشىلار زۋلفيا عابيدۋللينا، الەكسەي لۋكۋتين، جالعاس تايكەنوۆ ايتىپ بەرگەن بولاتىن. باسقا اتلەتتەر تاپسىرمانى جىل سوڭىنا دەيىن ورىنداۋى ءتيىس.