پاۆلوداردا ورالمانداردان اقشا جينايتىن الاياقتار پايدا بولدى

استانا. قازاقپارات - پاۆلودار وڭىرىندە شەتەلدەن كوشىپ كەلگەن ازاماتتارعا «قۇجاتتارىڭدى ءبىتىرىپ، ءۇي سالىپ بەرەمىز» دەپ اقشا جينايتىن الاياقتار توبى پايدا بولدى.

بۇل تۋرالى كەشە «نۇر وتان» پارتياسىنىڭ وبلىستىق فيليالىنداعى قوعامدىق قابىلداۋدا بولعان قىتايدان كەلگەن قانداسىمىز ەرجان ءالىمعازى ايتتى، دەپ حابارلايدى pavlodarnews.kz. «مۇنداي ۇيىمداسقان الاياقتار توبى شەتەلدەن كوشىپ كەلگەن اعايىنداردىڭ ورىس ءتىلىن تۇسىنبەيتىنىن جانە ءوز بەتتەرىمەن ءجۇرىپ، قاعاز- قۇجاتتارىن بىتىرە المايتىندارىن پايدالانىپ، وڭاي جولمەن اقشا تابۋدى كوزدەيدى»، - دەيدى ەرجان ءالىمعازى.

ناقتىراق ايتقاندا، «ارزان باعاعا ءۇي تاۋىپ بەرەمىز»، «از ۋاقىتتا قۇجات بىتىرەمىز» جانە «1 ميلليون 200 مىڭ تەڭگە كولەمىندە اقشا بولسا ءۇي سالىپ بەرەمىز» دەگەن جالعان ۋادە بەرەدى.

«سوندىقتان، الىستان كەلىپ جاتقان بارلىق قانداستارىما الاياقتارعا الدانىپ قالماۋعا كەڭەس بەرەمىن. قانداي جاعداي بولسا دا، قۇزىرلى ورگانداردان جانە مەملەكەتتىك مەكەمەلەردەن كومەك سۇراۋ كەرەك. سونىمەن قاتار، الاياقتىققا زاڭ جۇزىندە توسقاۋىل قويۋ كەرەك».

قانداسىمىزدىڭ ايتۋىنشا، مۇنداي الاياقتار توبى نەگىزىنەن الماتى وڭىرىندە كوپتەپ جينالىپ، بۇرىننان بەرى وسىنداي دەلدالدىقپەن اينالىسىپ جۇرگەن. ءتىپتى، قىتايدا تۇراتىن تۋىستارىنا دەيىن whatsapp جەلىسى ارقىلى حابارلاسىپ، وسىنى ايتقان.

ءبىراق، حابار تاراتقان ادامداردىڭ ناقتى اتى-ءجونى جانە قايدا قىزمەت ىستەيتىنى بەلگىسىز. ەرجاننىڭ ءوتىنىش-تىلەگىن تىڭداعان «نۇر وتان» پارتياسى مەن كوشى-قون پوليتسياسىنىڭ وكىلدەرى مۇنداي قىلمىستىڭ الدىن الىپ، زاڭ جۇزىندە توسقاۋىل قوياتىندارىن جەتكىزدى.