استانادا لاتىن الىپبيىندە شىققان كونە قازاق كىتاپتارىنىڭ كورمەسى اشىلدى
«لاتىن الىپبيىنە كوشۋ بىزگە كوپ قيىندىق تۋدىرمايدى. سەبەبى مەكتەپ ەسىگىن اشقان بالالاردىڭ بارلىعى لاتىن قارپىن بىلەدى. ەندى كەلەشەك ۇرپاققا نە كەرەك؟ بۇگىنگى جازىلعان كىتاپتاردىڭ ەڭ كەرەمەتىن ءارى قاجەتتىسىن ءبارىن لاتىنعا كوشىرەسىزدەر دەگەن سەنىمدەمىز. لاتىن الىپبيىنە كوشسەك، بۇكىل الەمنىڭ كەڭەستىگىن يگەرەمىز، عىلىمنىڭ تىلىنە كوشەمىز» ، - دەدى كورمەنىڭ اشىلۋى راسىمىندە مەملەكەت جانە قوعام قايراتكەرى مىرزاتاي جولداسبەكوۆ.
ءوز كەزەگىندە «قازاقستان - 2050» جالپى ۇلتتىق قوزعالىسى كەڭەسىنىڭ ءتوراعاسى مۇحتار مانكەيەۆ بۇل جوبانى اتالعان قوزعالىس پەن ق ر ۇلتتىق اكادەميالىق كىتاپحاناسى بەرلەسىپ ىسكە اسىرىپ جاتقانىن ايتا كەلە، «وسى تەكتەس شارالاردى الداعى ۋاقىتتا ۇيىمداستىرۋعا دايىنبىز. ءبىزدىڭ باستى ماقساتىمىزدىڭ ءبىرى - ول جاستار اراسىندا ادامي كاپيتالدى دامىتۋ. كورمەگە قىزىعۋشىلىق تانىتقان بارلىق ازاماتتاردى شاقىرامىز. ۇلتتىق اكادەميالىق كىتاپحاناسىندا لاتىن قارپىندە باسىلعان 1,5 مىڭعا جۋىق كىتاپ بار جانە ولار ءارتۇرلى جانردا جازىلعان»، - دەدى. سونىمەن قاتار ول استانادا باستالعان بۇل جوبانى ەلىمىزدىڭ وزگە دە وبلىستارىندا جالعاستىرۋعا شاقىردى.
ايتا كەتەيىك، كىتاپ كورمەسىندە سيرەك كىتاپتار قورىنان 1929-1940 -جىلدار ارالىعىندا لاتىن الىپبيىمەن باسىلىپ شىققان قازاق زيالىلارىنىڭ شىعارمالارى، كوركەم ادەبيەتتەر مەن بالالارعا ارنالعان كىتاپتار قويىلعان. وندا ابايدىڭ اۋدارمالارى مەن قارا سوزدەرى، ولەڭدەرى، سونداي- اق ءىلياس جانسۇگىروۆ، ساكەن سەيفۋلين، بەيىمبەت مايلين، مۇحتار اۋەزوۆ شىعارمالارى قامتىلعان. قازاقستاندا لاتىن ءالىپبيى رەسمي تۇردە 1929-1940 -جىلدارى پايدالانىلىپ، كەيىننەن كيريلليتساعا كوشىرىلدى.
اۆتور: رۋسلان عابباسوۆ
