قازاقستاندىق جاستار جۇمىس ىستەگىسى كەلمەيدى - ساراپشى

اتاپ ايتقاندا، زەرتتەۋلەرگە نەگىزدەلگەن باستى ماسەلەلەردىڭ ءبىرى - قازاقستاندىق جاستاردىڭ جۇمىسقا، تۇتاس ومىرگە دەگەن كوزقاراسى. «ەلىمىزدە قوعامنان شەتتەپ قالعان نەمەسە مارگينالدى جاستاردىڭ %9 بار، ولار الەمدە بار جانە ونىڭ سانى ارتىپ كەلەدى. ءبىراق ءبىزدىڭ مارگينالدى جاستارىمىزدىڭ تۇسىنىگى باتىسقا قاراعاندا وزگەشە. باتىستا بۇل سانالى تۇردە تاڭدالعان جول، نارازىلىق ءبىلدىرۋدىڭ ءبىر ءتۇرى. ال ءبىزدىڭ ەلدىڭ مارگينالدارى جۇمىس ىستەۋدىڭ قاجەتى جوق دەپ سانايدى. نەگە؟ سەبەبى، بۇل ماسەلەنى اتا- اناسى شەشۋ كەرەك دەپ ويلايدى. جاستاردىڭ كوپشىلىگى جۇمىستىڭ جوقتىعىنان ەمەس، جۇمىستىڭ ابىرويلى بولماۋىنان سەندەلىپ ءجۇر. بارلىعى ەڭبەك جولىن داياشى بولىپ باستاۋدان قاشادى، بىردەن «كرەسلوعا» جايعاسقىسى كەلەدى. باتىستا جوعارى ءبىلىمى بار ادامدار كەز كەلگەن جۇمىستى اتقارۋدان قىمسىنبايدى، سەبەبى ولارعا كۇن كورۋ كەرەك، تۋىستارىنان كومەك جوق. ال ءبىزدىڭ جاستار ديۆاندا شالقايىپ جاتا الادى»، - دەيدى تالعات قاليەۆ.

سونىمەن بىرگە، عزي باسشىسى جاستاردىڭ تامىر- تانىسسىز جۇمىسقا ورنالاسۋ مۇمكىن ەمەس دەپ ويلايتىنىن، بۇل تۇسىنىكتىڭ قالىپتاسۋىن جاستاردىڭ ۇلكەن ومىرگە قادام باسقىسى كەلمەۋىمەن ءتۇسىندىردى.

«قازاقستان جاستارىنىڭ %60 استامى مەملەكەت ماتەريالدىق كومەك بەرۋى ءتيىس دەپ ويلايدى. %92 جاستار تامىر- تانىسسىز جۇمىسقا ورنالاسۋ مۇمكىن ەمەس دەپ ەسەپتەيدى جانە وزدىگىمەن جۇمىسقا ورنالاسۋعا ۇمتىلمايدى دا. مەنىڭ كوپتەگەن دوستارىم كادر ىزدەپ جۇرەدى، مەنىڭ وزىمنەن بىرنەشە رەت جاس ماماندار تاۋىپ بەرۋدى سۇرادى. دەمەك، كادر تاپشىلىعى بارلىق جەردە سەزىلىپ وتىر. ال جاستار تامىر- تانىسى جەتەكتەپ اپارىپ، جۇمىسقا ورنالاستىراتىنىن كۇتىپ ءجۇر. بالكىم، بۇل تاپتاۋرىن ۇعىم جاستاردىڭ ەسەيگىسى كەلمەۋىنەن تۋىنداعان شىعار»، - دەيدى ول.

تالعات قاليەۆ وزىنە جەتكىلىكتى تۇردە كوڭىل بولىنبەگەن جاستاردىڭ راديكالدى ارەكەتتەرگە باراتىنىن جانە ولارعا ماتەريالدىق كومەكتەن بۇرىن رۋحاني قولداۋ ءبىلدىرۋدىڭ ماڭىزى زور ەكەنىن اتاپ ءوتتى. «جاستار ىشكى كۇيزەلىسكە ءجيى ۇشىرايدى جانە ءوز جولىن اداسپاي تابۋعا مۇقتاج. كاسىبي تۇرعىدا بەلگىلى ءبىر دەڭگەيگە قول جەتكىزىپ، قوعامداعى ءوز ورنىن تاپقاندا عانا ادام وزىنە سەنىمدى جانە بايسالدى بولادى. جاستار وزىنە نازار اۋدارىلماعاندىقتان راديكالدى، ءتىپتى ەكسترەمالدى يدەيالارمەن اينالىسا باستايدى، ولار مورالدى- پسيحولوگيالىق قولداۋعا اسا مۇقتاج. كەي كەزدەرى اقشادان بۇرىن ءدال وسىنداي قولداۋلار اۋاداي قاجەت»، - دەپ تۇيىندەدى ءوز ءسوزىن ساراپشى.

اۆتور: ايجان سەرىكجان قىزى