كيم چەن ىن زىمىراندى جاساپ شىعارۋشىلارعا مەملەكەتتىك ناگرادالار تابىستادى

بۇل تۋرالى بەيسەنبى كۇنى سولتۇستىك كورەيانىڭ كوشباسشىسى كيم چەن ىن ءمالىم ەتتى، دەپ حابارلايدى قازاقپارات س ت ا ك اقپاراتتىق اگەنتتىگىنە سىلتەمە جاساپ.

«بۇل وقيعا ەكونوميكانى دامىتۋمەن ءبىر مەزگىلدە يادرولىق كۇشتەردى نىعايتۋ جونىندەگى پارتيا تاڭداعان باعىتتىڭ نەگىزدىلىگىن راستادى»، - دەپ كەلتىرەدى رەسپۋبليكا كوشباسشىسىنىڭ ءسوزىن كوتا اگەنتتىگى.

كيم چەن ىن قورعانىس ونەركاسىبىمەن اينالىساتىن عالىمدار مەن تەحنولوگتار «جاساپ شىعار نەمەسە ءول!» ۇرانىمەن اسكەري كەپىلدىكتەردى قامتاماسىز ەتۋدە جاڭا تابىستارعا قول جەتكىزەتىنىنە سەنىمدى. قۇرلىقارالىق بالليستيكالىق زىمىرانىن جاساپ شىعارعاندار كيم ير سەن، كيم چەن ير وردەندەرىمەن ماراپاتتالدى.

ولارعا «بالعا مەن وراق» بەلگىلەنگەن التىن مەدالدار مەن مەملەكەتتىك تۋ ءبىرىنشى دارەجەلى وردەنى تابىستالا وتىرىپ، ك ح د ر باتىرى، ك ح د ر ەڭبەك ەرى اتاعى بەرىلدى. ال تەحنولوگتاردىڭ، جۇمىسكەرلەر مەن ينجەنەرلەردىڭ ۇلكەن توبىنا كيم ير سەن مەن كيم چەن يردىڭ بەينەسى بەينەلەنگەن ساعاتتار مەن قازىرگى ەل كوشباسشىسىنىڭ ناقىل سوزدەرى توپتاستىرىلعان جيناق تابىس ەتىلدى.

كوتا دەرەكتەرىنە سايكەس، كيم چەن ىن زىمىراندى ۇشىرۋ تۋرالى بۇيرىققا 3 -شىلدەدە قول قويعان. ول پوليگونداعى سىناققا ءوزى باسشىلىق ەتتى. زىمىراننىڭ ۇشىرىلىم ۋاقىتى - 39 مينۋتتى، ۇزاقتىعى - 933 شاقىرىمدى، بيىكتىگى 2802 شاقىرىمدى قۇرادى.