بەكبولات تىلەۋحانوۆ ءوزى قالاعانىنان دا كوبىرەك جەتىستىككە جەتۋىنىڭ قۇپياسىن اشتى
استانا. قازاقپارات - بەكبولات تىلەۋحانوۆ جەتىستىك تۋرالى پىكىرىن ءبولىسىپ، جاستاردى ءاردايىم قامشىلاپ وتىرۋعا كەڭەس بەردى.
مۇنىمەن قاتار، ول ءوزىن ومىردەگى تابىستى ادامدار قاتارىنا قوساتىنىن ايتتى. سەبەبى، ءوزى قالاعانىنان دا كوبىرەك جەتىستىككە جەتكەن ەكەن.
بۇل تۋرالى «ايەل باقىتى» باعدارلاماسىندا ايتىلدى.
- جەتىستىك دەپ نە نارسەنى ايتۋعا بولادى؟
- ءار ادام ءۇشىن جەتىستىك ءارتۇرلى. بىرەۋدىڭ جەتىستىك دەپ ماقتان تۇتىپ جۇرگەن نارسەسى، ەكىنشى ءبىر ادام ءۇشىن تۇككە تۇرمايتىن دۇنيە بولىپ ەسەپتەلۋى مۇمكىن. سول سەبەپتى، ونى ءار ادامنىڭ جەكە سۋبەكتيۆتى كوزقاراسىنا بايلانىستى دۇنيە دەپ ويلايمىن. باستىسى - الدىڭا قويعان ارمان- ماقساتتارىڭا جەتۋ. ءبىراق، ول تاۋسىلمايدى.
بايلىق پەن لاۋازىمدى باقىت دەپ ويلايتىن ادامدار بار. كەي ادام جان تىنىشتىعىن اڭسايدى. جۇرەگىڭ تىنىشتىق تاپقان جەرگە جەتۋ - سەنىڭ جەتىستىگىڭ. ءبىراق، ماقساتىنا جەتكەن ادامنىڭ سونى قاناعات تۇتقانىن كورمەدىم. بۇل ادام بالاسىنىڭ تابيعاتى شىعار؟ !
- قازىرگى تاڭعا دەيىن قانداي جەتىستىككە جەتتىم دەپ ويلايسىز؟
- مەن ويلاعانىمنان الدەقايدا جوعارى جەتىستىكتەرگە جەتتىم. اۋىلدا وسكەن بالامىن. ءبىز ءۇشىن سوۆحوزدىڭ ديرەكتورى بولۋ باقىت بولىپ كورىنەتىن. رايكومنىڭ ءبىرىنشى حاتشىسىنان جوعارى لاۋازىم جوق بولىپ كورىنەتىن. دىتتەگەن مۇددەلەرىمنەن اسىپ، كوپ نارسەگە قول جەتكىزدىم. ومىردە اللا ءساتىن سالىپ، جولىم بولعان اداممىن.
- جاستاردى جەتىستىككە جەتەلەۋ ءۇشىن نە ىستەۋىمىز كەرەك؟
- ولاردى قامشىلاپ وتىرۋىمىز كەرەك. «بالىق ۇستاپ بەرمە، قولىنا قارماق بەر» دەپ ايتىلعان جاقسى ءسوز بار. ماعجان ايتپاقشى، ءاردايىم جاستارعا سەنۋىمىز كەرەك.
