مادەنيەت ءمينيسترى الماتى وبلىسىنداعى كونە قالاشىقتاردا بولدى
ۆەدومستۆو باسشىسى قورىق- مۋزەيدىڭ تىنىس- تىرشىلىگىمەن جانە ونداعى عالىمداردىڭ حالىقارالىق عىلىمي ەكسپەديتسيالارى بارىسىندا تابىلعان جادىگەرلەرمەن تانىستى. سونداي- اق مينيستر تالحيز، راحات جانە ورىكتى كونە قالاشىقتارىندا بولىپ، قازاقستاندىق ارحەولوگتارمەن كەزدەستى.
«ەسىك» قورىق- مۋزەيى قازاقستاندا العاشقىلاردىڭ ءبىرى بولىپ عىلىمي جانە عىلىمي- تەحنيكالىق جۇمىس نىسانى رەتىندە ارحەولوگيالىق زەرتتەۋلەر جۇرگىزۋگە ليتسەنزيا الىپ، مەملەكەتتىك اككرەديتاتسيادان وتكەن بولاتىن. ءدال وسى ەسىك قورعاندارى اراسىندا قازاقستاننىڭ باعا جەتپەس ارحەولوگيالىق ولجاسى - «التىن ادام» تابىلعان بولاتىن. 
ءمينيستردىڭ ايتۋىنشا، قازىرگى تاڭدا جەرگىلىكتى بيلىكپەن تالحيز قالاشىعىن «ەسىك» قورىق- مۋزەيى قاراماعىنا وتكىزۋ ماسەلەسى قارالىپ جاتىر.
«ەڭ ءبىرىنشى كەزەكتە جەر- كاداسترلىك ماسەلەلەردى شەشىپ الۋ كەرەك. سونداي-اق ءبىز تاريحي- مادەني نىسانداردىڭ تۋريستەرگە قولجەتىمدىلىگىن، ينفراقۇرىلىمى مەن كوممۋنيكاتسيالارىن جاقسارتۋ جونىندە اڭگىمەلەستىك. بۇل جەردە تۋريستەرگە ساپالى سەرۆيس كورسەتەتىن ۆيزيت- ورتالىقتار سالۋ قاجەت»، - دەپ اتاپ ءوتتى ارىستانبەك مۇحامەدي ۇلى. ەستەرىڭىزگە سالا كەتەيىك «ەسىك» مەملەكەتتىك تاريحي- مادەني قورىق- مۋزەيى ەلباسى تاپسىرماسىمەن «مادەني مۇرا» باعدارلاماسى اياسىندا 2010 -جىلدىڭ 30 -قاڭتارىندا قۇرىلعان بولاتىن. قازىرگى تاڭدا بۇل عىلىمي ورتالىق ءتۇرلى حالىقارالىق ۇيىمدارمەن جانە ارحەولوگتارمەن الماتى وبلىسى اۋماعىندا ارحەولوگيالىق زەرتتەۋلەر جۇرگىزۋدە.
اۆتور: سامال قابىشەۆا
