پاۆلودارلىق جاس جىگىت ءبىر تيىنسىز جەر شارىن اينالىپ شىعۋ ساپارىنا دايىندالىپ جاتىر

بۇل تۋرالى Sputnik قازاقستان حابارلايدى.

ول ەش قاراجاتسىز جەر شارىن اينالىپ شىعۋ تۋرالى يدەياسىن جاقىندا الەۋمەتتىك جەلىدە جاريا ەتكەن. وسىعان دەيىن ول اۆتوستوپ ارقىلى 19 جاسىندا قىرعىزستانعا، سوسىن ورالعا ساياحات جاساپتى. ال جەر شارىن اينالىپ شىعۋ تۋرالى ريشات ءۇش جىل بويى ويلانعان، اقىرىندا جولسەرىك تاۋىپ بەل بۋىپ ىسكە كىرىسپەكشى.

«ونىڭ جاسى 23 تە، چەليابينسكىدە تۇرادى. ءبىز 30 - ماۋسىمنان باستاپ سويلەسىپ، بىرگە ساياحاتتايتىن بولىپ شەشتىك. ونىڭ ءتولقۇجاتى 5 - تامىزدا دايىن بولادى. ومسكىدە كەزدەسىپ، بايكالعا قاراي كەتەمىز، تاۋلى التاي ارقىلى ءجۇرىپ ءوتىپ، ءبىر ايدان سوڭ ءتولقۇجاتتى الۋعا ورالامىز. مەن قيىندىق پەن قىزىققا تولى ساپاردى جالعىز وتكەرمەيتىنىم ءۇشىن قۋانىشتىمىن»، - دەيدى ريشات.

ولار ساياحات بارىسىندا ساپارشىلاردى قوندىراتىن ادامدار تابۋعا قولايلى couchsurfing.com حالىقارالىق سەرۆيسىن پايدالانباق. سونداي- اق، ول ينستاگرامداعى جازىلۋشىلارىنىڭ دا كومەگىنە ارقا سۇيەيتىنىن جاسىرمايدى.

ولار اۆستراليا مەن انتاركتيدانى قوسا ەسەپتەگەندە بۇكىل قۇرلىققا اياق باسۋعا نيەتتى.

«باسقالاي جول جوق جەرلەرگە ۇشىپ بارامىز. سونداي- اق، كەمە مەن اۆتوكولىك جولدارى دا بار. مىسالى، پەتەربۋرگتەن كورابل ارقىلى ەكۆادورعا بارۋعا بولادى. مەن ەشكىمگە ەشتەڭەنى دالەلدەگىم كەلمەيدى، تەك باقىتتى بولعىم كەلەدى»، - دەيدى ول.

ونىڭ اناسى دا ۇلىنىڭ ۇنەمى ۇيدە بولمايتىنىنا ۇيرەنگەن. سول سەبەپتى ساياحاتتاۋىنا بىردەن رۇقساتىن بەرىپتى.