ديزاينەر گۇلجان مۇرات قىزى: ساۋاتتى جارناما - قالا كوركى

بۇگىنگى  تاڭدا ولار ءار سالادا قىزمەت ەتىپ، ەگەمەندى ەلدىڭ ەرتەڭى ءۇشىن ءوز ۇلەستەرىن قوسىپ جاتىر.  سولاردىڭ  ءبىرى - العاشقى جۇمىسىن كىشى- كىرىم فوتو سالون، تانىسقىلار شىعارىۋدان باستاپ، بۇگىنگى تاڭدا  شاعىن دۇكەنىن   ۇلكەن  جارناما ورتالىعىنا اينالدىرىپ، قانشاما ادامداردى جۇمىسپەن قامتىپ وتىرعان، استاناداعى بەلدى جارناما ورتالىقتاردىڭ ءبىرى   «ORDA-print»  كومپانياسىنىڭ ديرەكتورى  گۇلجان مۇرات قىزى .

قالا كوشەلەرىندە ءىلىنىپ تۇرعان ءارتۇرلى  جارنامالار مەن ماڭدايشا جازۋلارىنىڭ  شاھارىمىزدىڭ بەت- بەينەسىنە وزىندىك اسەر ەتەتىنى ءسوزسىز. ەلىمىزدە الەم كوز تىككەن ايتۋلى شارا ءوتىپ جاتقان بۇگىنگى تاڭدا بۇل تىپتەن ماڭىزدى. گۇلجان مۇرات قىزى   باسقاراتىن   «ORDA-print»  جارناما ورتالىعى جاقىندا عانا استانا قالاسى اكىمدىگىن تاراپىنان  «ۇزدىك جارناما -2017»   جۇلدەسىمەن ماراپاتتالدى. وسى  ورايدا ءبىز گۇلجان مۇرات قىزىن سۇحباتقا شاقىرعان ەدىك  .

 -  جۇلدە قۇتتى بولسىن !  بۇل بايقاۋعا قاتىسۋشىلار قانداي شارتتار نەگىزىندە ىرىكتەلدى ؟

 -  بايقاۋدى استانا قالاسى اكىمدىگى تىلدەردى دامىتۋ باسقارماسى  جىل سايىن وتكىزىپ تۇرادى.  باستى ماقسات  -  بيلىك پەن حالىق جانە جارناما وندىرىستىك كومپانيالارى اراسىنداعى   قارىم- قاتىناستى  كۇشەيتۋ . سول ارقىلى ءارتۇرلى جارناما ونىمدەرىندەگى مەملەكەتتىك ءتىلدىڭ   اياسىن كەڭەيتۋ. بايقاۋدىڭ شارتتارى كۇردەلى ەمەس ،  ەڭ باستىسى وسى سالادا جۇمىس جاساپ جاتقان كەز كەلگەن جەكە كاسىپكەر قاتىسا الادى جانە تولىق ءوندىرىس قۇرال  - جابدىقتارى بولۋى شارت. استانا قالاسىندا   بۇل جاعىنان 150  گە جۋىق   ۇلكەندى- كىشىلى قىزمەت كورسەتۋ ورىندارى بار، ونىڭ ىشىندە 50 گە تارتا تولىق ءوندىرىستى ورىندار جۇمىس جاسايدى .

-  بۇگىنگى تاڭدا جارناما سالاسىندا قانداي ماسەلەلەر بار ؟  قازاق ءتىلدى جارنامالاردىڭ  اۋقىمى نەگە تومەن ؟

 -  بۇل ورتا جانە شاعىن بيزنەستىڭ ءبىر ءتۇرى .  قوعامدىق سۇرانىسقا  اركىم ءوز الىنشە جاۋاپ بەرىپ جاتقان جايى بار . دەگەنمەن، ساقتالىپ وتىرعان باستى ماسەلەلەردىڭ ءبىرى   - جارناما زاڭدىلىعىنىڭ ساقتالماۋى. اسىرەسە جارناما ماتىنىندەگى   تىلدىك نورمانىڭ دۇرىس قولدانىلماۋى . كورنەكى اقپاراتتىڭ بارلىق ءماتىنى مەملەكەتتىك تىلدە سول جاعىندا،   ورىس تىلىندە وڭ جاعىندا نەمەسە تومەنگى جاعىنا ورنالاسۋ قاجەت. قاجەتتىلىگىنە قاراي كورنەكى اقپاراتتىڭ ماتىندەرى قوسىمشا باسقا دا تىلدەرگە اۋدارىلۋى مۇمكىن. ال مۇنداي جاعدايدا قارىپ ولشەمى نورماتيۆتى قۇقىقتىق اكتىلەردە بەلگىلەنگەن تالاپتاردان اسپاۋى ءتيىس. الايدا، كوپ جاعدايدا بۇل تالاپتار ورىندالماي قالىپ جاتادى .  سونىمەن بىرگە   تاپسىرىس بەرۋشىلەر تاراپىنان جارناما ءماتىنى تەك ورىس تىلىندە   عانا بولسىن دەيتىندەر دە كوپ .  بۇل  ءبىزدىڭ ەلدە قالىپتاسىپ كەتكەن ءۇردىس. ءتىپتى   قازىر   وزگە شەتەل تىلدەرىندە جارناما ماتىندەرىن جازىپ ءىلىپ قوياتىندار دا پايدا بولا باستادى. ەڭ وكىنىشتىسى شەتەلدىك كومپانيالار تاراپىنان وتەتىن ءارتۇرلى ءىس- شارالاردا ورىس ءتىلى جانە سول ەلدىڭ تىلىمەن جازىلعان پلاكاتتاردىڭ تۇراتىنى قىنجىلتادى.

 -  جارناما سالاسىندا كوبىنەسە وزگە ۇلت وكىلدەرىن ءجيى كوزىمىز شالادى. قازاق جاستارىنىڭ بۇل سالاعا بەتبۇرىسى قالاي ؟

 -  جارناما  - بۇل نازىك ءارى كۇردەلى سالالاردىڭ ءبىرى. بۇندا ديزاينەرلىك كوركەمدىك، تەحنيكانىڭ   ساپالىلىعى جانە قىزمەتكەرلەردىڭ شەبەرلىگى، بىلىمدىلىگى ءبارى ماڭىزدى ءرول اتقارادى.  بۇل سالادا   بەلسەندى جۇمىس جاساپ جاتقان قازاق جاستارى كوپ، دەسە   دە، ءالى   دە باسىمدىلىق وزگە ۇلت وكىلدەرىندە ەكەندىگىن مويىندايمىز. نەگە ەكەنىن بىلمەيمىن   جاستاردىڭ باسىم بولىگى وندىرىستىك سالادان كورى اكىمشىلىك   سالاداعى ماماندىقتاردى كوپ تاڭدايدى. سوسىن جۇمىس تاپپاي جۇرەدى. ال ءبىز سەكىلدى وندىرىستىك كومپانيالار مامان تاپپاي جاتادى. اسىرەسە قازاق ءتىلدى ديزاينەرلەر وتە از.  بۇگىنگى تاڭدا مەملەكەتتىك   تىلدەگى ماتىندەرگە سۇرانىس ارتىپ كەلەدى. سوعان سايكەس قازاق ءتىلدى   ديزاينەرلەرگە سۇرانىس وتە جوعارى. وكىنىشكە وراي   ءبىزدىڭ جاستار جاڭا تەحنولوگيانى مەڭگەرۋدەن كورى  ،  جەڭىل   جولمەن   اقشا تابۋعا بەيىم تۋرادى. جاھاندانۋ داۋرىندە باسەكەگە قابىلەتتى بولۋ ءۇشىن جاستارىمىز جاڭا تەحنيكالاردىڭ ءتىلىن ءبىلىپ، قۇلاعىندا ويناۋى كەرەك. سوندىقتان مەن جاستاردى وندىرىستىك سالاداعى ماماندىقتاردى   تالداۋعا شاقىرامىن.

ەلىمىزدە   ءوتىپ جاتقان ەكسپو  - 2017  كورمەسى قارساڭىندا، وتاندىق جارناما كومپانيالارنىڭ جاڭا تەحنولوگيامەن دايىندالاتىن ونىمدەردى شىعارۋعا ءالى دايىن ەمەس ەكەنىن بايقاتتى .  مىسالى  3D  فورماتىنداعى باسپالار،   پلانشەتتى باسىپ شىعارۋ ونىمدەرىنە بولعان سۇرانىستى ورىنداي المادىق. بۇل ونىمدەردى   ەلىمىزگە   قىتاي، تۇركيا سەكىلدى ەلدەردە دايىنداپ اكەلۋگە تۋرا كەلەدى. ءبىز الداعى ۋاقىتتا وسى ولقىلىقتىڭ ورنىن تولىقتىرعىمىز كەلەدى.

 -  ءسىز نەدەن باستادىڭىز، ءقازىر قانداي باعىتتا جۇمىستار جاسايسىز ؟

 -  مەن ەڭ العاش 7  جىل بۇرىن ۆيزيتكا جاساۋدان باستادىم. بىرتىندەپ تاپسىرىستار الىپ، ءوزىم جوبالاپ، باسقا سەحتارعا اپارىپ شىعارىپ الىپ ءجۇردىم .  اقىرىنداپ كليەنت توپتاپ،  كەيىن ءوزىم سەحتار ساتىپ الىپ ، شىعارا باستادىم .  وسىلاي ءوندىرىسىمدى كەڭەيتتىم .  ءاربىر ىستە تابىسقا جەتۋ ءۇشىن تاباندىلىق   پەن سابىر كەرەك ەكەنىن ءتۇسىندىم.   قۇدايعا شۇكىر، بۇگىنگى تاڭدا وسى سالادا ءوز ورنىمىزدى تاپتىق.   قوعامداعى ءتۇرلى ءىس- شارالارعا بەلسەندى ارالاسامىز. بيىلعى ەلىمىزدە ءوتىپ جاتقان ايتۋلى شارا ەكسپو -2017- گە   دە مۇمكىندىگىمىزشە قىزمەت كورسەتىپ، ءوز ۇلەسىمىزدى قوستىق.

- ءوزىڭىز ايتىپ وتكەندەي ، ەلىمىزدە الەم كوز تىككەن ۇلكەن شارا ءوتىپ جاتىر. وسى  كورمە  قارساڭىندا سىزدەردىڭ دە جاۋاپكەرشىلىكتەرىڭىز جوعارى سەكىلدى ؟

-   ارينە ، ساۋاتتى دا كوركەم جاسالعان، كوزدىڭ جاۋىن الاتىن اسەم جارنامالار  -   قالامىزدىڭ ءسانى، بولمىسىمىزدىڭ، قوعامداعى قازاق ءتىلىنىڭ ايناسى. ۇلتتىق بوياۋى قانىق جارنامالار ارقىلى ءبىز ءوز بەت- بەينەمىزدى كورسەتە الامىز. وسىنى جارناما اگەنتتىكتەرى ءتۇسىنۋى كەرەك .  ءاربىر ىسىنە جاۋاپكەرشىلىكپەن قاراپ، قالامىزدىڭ   بەت- بەينەسىنە،   انا ءتىلىمىزدىڭ اقساماۋىنا ءوز ۇلەستەرىن قوسۋى كەرەك دەپ بىلەمىن. مۇمكىندىگىنشە ازاماتتاردى مەملەكەتتىك تىلدە جارناما بەرۋگە   ىنتالاندىرسا  دەيمىن. مىسالى ءبىزدىڭ  «ORDA-print»   جارناما ورتالىعى   مەرەكە ،  مەيرامدار قاراساڭىندا قازاق تىلدە ۆيزيتكا جاساتقان ادامدارعا 50 پايىز جەڭىلدىك، كەيدە تەگىن جاساپ بەرۋ   سەكىلدى   اكسيالار ۇيىمداستىرىپ  تۇرادى  .

جارناما سالاسىنىڭ ارالاسپايتىن تاقىرىبى جوق ، كوشەدەگى كەز كەلگەن ماڭدايشا جازۋى ،  ءارتۇرلى باننەرلەر  ،  اقپارات تاقتالارىنىڭ ىلىنۋىنە وسى سالا تىكەلەي قاتىسادى .  كەيدە جارناما اگەنتتىكتەرىنىڭ نەمقۇرايلىلىعىنان قانشاما مەملەكەتتىك تىلدەگى ماتىندەر قاتە جازىلىپ تۇرادى. بۇعان ارينە  كەز كەلگەن قاراپايىم ادامنىڭ بەلسەندىلىگى مەن قۇزىرلى ورىنداردىڭ ارالاسۋى قاتتى كەرەك - اق .  ودان بولەك، ءار جارناما اگەنتتىگىندە ساۋاتتى اۋدارماشىلار بولۋى كەرەك .  قۋانتارلىق جاعداي   - وسى باعىتقا   بەلسەندى   ازاماتتار ءتۇرلى الەۋمەتتىك جەلىلەر ارقىلى قوعام نازارىن اۋدارىپ، جارناما يەسىنە قاتەلەرىن كورسەتىپ، تۇزەتىپ كەلەدى. وسىنداي ەل مۇددەسىنە بەيجاي قارامايتىن ازاماتتار كوپ بولسا دەيمىن.  

 -   وتاندىق ءونىمدى وزگە ەلدەردە جارنامالاۋدىڭ قانداي جولدارىن ۇسىنار ەدىڭىز ؟

 - وتاندىق ءونىمدى جارنامالاۋدا ەڭ الدىمەن سول ەلدىڭ الەم الدىنداعى بەدەلى وتە ماڭىزدى. ەلباسىنىڭ جاساپ جاتقان ءتۇرلى شارالارى وسى باعىتقا وڭ سەرپىن  بەرەدى. ەكىنشىدەن، جارنامانى سول ءونىمنىڭ الەۋەتىنە قاراي ويلاستىرعان دۇرىس. ناقتىراق ايتقاندا ءسىزدىڭ ءونىمىڭىز سول جارناما ماتىنىنە تولىق جاۋاپ بەرەتىندەي ساپالى بولۋى ەڭ ماڭىزدى.  قازىرگى تاڭدا قازاقستاندىق ونىمدەردەرگە، اسىرەسە ءبىزدىڭ جاسىل ونىمدەرگە سۇرانىس جوعارى. ەكونوميكاسى دامىعان ەلدەردىڭ ءبارى دەنساۋلىققا زالالسىز ونىمدەردى قانداي باعادا بولسا   دا الۋعا دايىن. ءبىز وسى مۇمكىندىكتى جاقسى پايدالانۋىمىز كەرەك دەپ بىلەمىن  .

سۇحباتىڭىزعا  راحمەت ! جۇمىستارىڭىز  تابىستى بولسىن !

اۆتورى: ريزابەك نۇسىپبەك ۇلى