نازاربايەۆتىڭ ءوز قولىمەن سىزعان سۋرەتى استانانىڭ كورىكتى عيمارات، ەسكەرتكىشتەرىنە اينالدى

 قازاقستان رەسپۋبليكاسىنىڭ پرەزيدەنتىنىڭ ءومىرى جايلى ەڭ العاشقى رەسمي تاريحي- بيوگرافيالىق زەرتتەۋ كىتابىندا استاناداعى «وتان- انا» مونۋمەنتى مەن پرەزيدەنتتىڭ مادەنيەت ورتالىعىنىڭ ن. نازاربايەۆتىڭ قولىمەن سالىنعان نوبايلارى بەرىلگەن. راسىندا، باس قالانىڭ كوپتەگەن عيماراتتارى، ەسكەرتكىشتەرى كەزىندە پرەزيدەنتتىڭ سۋرەت، سىزبا جانە نوباي تۇرىندە تۇسىرگەن ويلارىنان، يدەيالارىنان الىندى. ال قالا قۇرىلىسىنا قاتىسقان الەمنىڭ بەلگىلى ساۋلەتكەرلەرى نۇرسۇلتان نازاربايەۆتىڭ ويلارىن ومىردە جۇزەگە اسىرا ءبىلدى. ولاردىڭ اراسىندا كيسە كۋروكاۆا، سەر نورمان فوستەر، كەنزو تانگە جانە تاعى باسقالار بار. عيماراتتاردىڭ باسىم كوپشىلىگى استانانىڭ ەڭ كورنەكى ورىندارى مەن قالانىڭ وزىندىك رامىزدەرىنە اينالدى. سونىڭ ءبىرى - استاناداعى بۇرىنعى پرەزيدەنتتىك مادەنيەت ورتالىعى، قازىرگى قازاقستان رەسپۋبليكاسى قارۋلى كۇشتەرىنىڭ اسكەري- تاريحي مۋزەيى.

بۇل - استانا ساۋلەتىندەگى ءزاۋلىم عيماراتتاردىڭ ءبىرى. بۇرىنعى ورتالىق، قازىرگى مۋزەي ۇلكەن بيىكتىكتەن قازاق حالقىنىڭ مادەنيەتىنە ءتان، ساۋلەلەرى الەمنىڭ ءتورت بۇرىشىنا تارالاتىن دوڭگەلەك رەتىندە كورىنەدى. بۇكىل ساۋلەت كومپوزيتسياسىنىڭ وستىك ورتالىعى راديۋسى 19,5م، عيماراتقا تۇركىلىك سيپات بەرەتىن، 16 مەترلىك كۇمبەزبەن بەكىتىلگەن 5 قاباتتى مۇراجاي بولىپ تابىلادى. كۇمبەزدىڭ جوعارعى جاعى ءبىرىنشى قاباتتىڭ ەدەنى دەڭگەيىندە ورنالاسقان. ەلباسىنىڭ يدەياسىنان تۋىپ، نوبايىنا دەيىن ءوزى سىزعان تاعى ءبىر ەسكەرتكىش - وتان انا مونۋمەنتى.

«وتان قورعاۋشىلار» مەموريالى سيمۆوليكالىق مازمۇنى كەشەگى مەن بۇگىنگى، ەرتەڭگى ۇرپاقتار جالعاستىعىن بىلدىرەدى. مەموريالدىڭ وزەگى - بيىكتىگى 37,5 مەتر، سالماعى 63 توننالىق الىپ مونۋمەنت - انا بەينەسى. اق كيمەشەكتى ايەل- انا التىنداتىلعان زەرلى كەسەسىنە اق قۇيىپ ونى، ۇلتتىق داستۇرگە تولى كوڭىلىمەن، كەلە جاتقاندارعا قوس قولداپ ۇسىنۋدا. ەسكەرتكىش 2001 -جىلى 7 مامىردا تۇرعىزىلدى. 2003 -جىلى نۇرسۇلتان نازاربايەۆ «Wall street journal» گازەتىنىڭ «پرەزيدەنت جاڭا استانانى جوبالاۋعا قاتىستى ما؟ » دەگەن سۇراعىنا: « ءاربىر ءۇيدى جوبالاۋعا قاتىستىم. ءاربىر ارحيتەكتۋرالىق جوباعا قاتىستىم. بۇل ءتىپتى ۇيلەردىڭ تۇسىنە دە قاتىستى.. . مەن - ارحيتەكتورمىن جانە وعان ەش ۇيالمايمىن» ، - دەپ جاۋاپ بەرگەن ەكەن.

 ال «ەۋرازيا جۇرەگىندە» اتتى كىتابىندا نۇرسۇلتان نازاربايەۆ بىلاي دەپ جازادى: « ءداۋىردىڭ تابى مەن مانەرى ەكى- ءۇش ايشىقتى سىزبامەن بەينەلەنە بەرەدى. ەيفەل مۇناراسى، ۆەستمينستەر، كرەمل.. . بۇل استانالىق نىشاندار - الەم كارتاسىنىڭ ەڭ ۇزدىك جولباسشىلارى. ولار بۇل كۇندە سولاي جاراتىلعان سياقتى قابىلدانادى. الايدا ولار بەلگىلى ءبىر ادامداردىڭ دارىنىمەن جانە ەڭبەگىمەن جاسالعان. استانانى قۇرۋ - ۇلتتىق تاريحتىڭ جاڭا ءماتىنىن جازۋ. مۇنداي مارتەبە ءار ۇرپاقتىڭ ماڭدايىنا بۇيىرا بەرمەگەن. ەكى مىڭ جىلدىقتىڭ توعىسىندا ءبىز شەشىم قابىلداپ، ەۋرازيانىڭ جۇرەگىندە ءىس جۇزىندە جاڭا استانا قۇردىق. قاس قاعىمداي بولىپ سەگىز جىل وتە شىقتى. كۇندەلىكتى قاۋىرت تىرشىلىكتەن قولىم قالت ەتكەندە، مەن وسى كىتاپتا كۇندەلىك جازبالارىمنىڭ شاشىراڭقى بەتتەرىن بىرىكتىرۋدى ۇيعاردىم. كۇردەلى شەشىمدەر، قاناتتاستاردىڭ كومەگى، ساۋلەت سالاسىنداعى ىزدەنىستەر، قالانىڭ بولاشاعى تۋرالى ويلار، ولكەنىڭ اڭىزدارى مەن جەر- سۋ اتاۋلارى، تۇرمىستىڭ تۇيتكىلدەرى، تاريحي سالىستىرمالار، استانانىڭ بەدەرى مەن اسەمدىگى، ءبىر سوزبەن ايتقاندا، جاڭا ەلورداعا ارنالعان مەنىڭ ويلارىم مەن ىستەرىم - ءبارى- ءبارى وسىندا» .

اۆتور: قانات مامەتقازى ۇلى