بۇگىن كەي وڭىردە اپتاپ ىستىق بولىپ، كەي وڭىرلەردە جاڭبىر ارالاس بۇرشاق جاۋادى

استانا. قازاقپارات - اتموسفەرالىق اعىنداردىڭ وتۋىنە بايلانىستى قازاقستاننىڭ باسىم ايماقتارىندا قۇبىلمالى اۋا رايى ساقتالادى، كەي جەرلەردە نايزاعايمەن بىرگە جاڭبىر كۇتىلەدى، جەلدىڭ كۇشەيۋى، بۇرشاق بولۋى مۇمكىن، دەپ حابارلايدى قازگيدرومەت.

رەسپۋبليكانىڭ باتىسى مەن وڭتۇستىگىندە جاۋىن- شاشىنسىز ىستىق اۋا رايى ساقتالادى. سولتۇستىك قازاقستان، پاۆلودار وبلىستارىندا جەل 15-20، كەي جەرلەردە ەكپىنى 25 م/س كۇشەيەدى، بۇرشاق بولۋى مۇمكىن.

اقمولا، شىعىس- قازاقستان، اقتوبە وبلىستارىنىڭ كەي جەرلەرىندە جەلدىڭ كۇشى 15-20 م/س جەتىپ، بۇرشاق جاۋۋى ىقتيمال. قوستاناي وبلىسىندا كەي جەرلەرىندە جەل تۇرىپ، ەكپىنى 23 م/س جەتەدى.

باتىس قازاقستان، كۇندىز اتىراۋ، جامبىل، قاراعاندى وبلىستارىندا جەلدىڭ كۇشى 15-20 م/س كۇتىلەدى. كۇندىز  قىزىلوردا، ماڭعىستاۋ وبلىستارىنىڭ كەي جەرلەرىندە جەلدىڭ كۇشى 15-20 م/س، شاڭدى داۋىل تۇرادى. كۇندىز قىزىلوردا وبلىسىندا اپتاپ ىستىق. الماتى، جامبىل، وڭتۇستىك قازاقستان، باتىس قازاقستان، قوستاناي، قاراعاندى وبلىستارىندا دا قاتتى ىستىق، ماڭعىستاۋ، اتىراۋ، اقتوبە وبلىستارىندا كۇن ىستىق، ال كەي جەرلەردە اپتاپ بولادى. 

قىزىلوردا، وڭتۇستىك قازاقستان، قاراعاندى، قوستاناي، اتىراۋ، باتىس قازاقستان وبلىستارىنىڭ كەي جەرلەرىندە وتە جوعارى ءورت قاۋپى ساقتالادى.