قادىر مىرزا ءالي ولجاستى قالاي قازاقشا سويلەتتى؟

قازاق وقىرماندارى ولجاستىڭ وتتى جىرلارىن قادىر اقىننىڭ اۋدارماسىندا ءجيى ۇشىراتادى. الايدا، كەشەگى عاسىردىڭ سوڭعى شيرەگىنەن بۇگىنگى كۇنگە دەيىن سۇلەيمەنوۆتى قازاقشا سويلەتكىسى كەلگەن اقىندار كوبەيمەسە ازايعان جوق. وسى تۇستا ءبىر ايتا كەتەرلىگى، قازاق وقىرمانى ولجاستى قادىردىڭ اۋدارمالارى ارقىلى تانىدى دەسەك قاتەلەسە قويماسپىز. قازاقتىڭ قادىرى ادامزاتتىڭ اقىنىنا اينالعان ولجاستى قالاي قازاقشا سويلەتتى؟ بۇل جونىندە اقىن ءوز ەستەلىگىندە بىلاي دەيدى:

"مەن بۇرىن دا ءتيىپ- قاشىپ اۋدارما جاساپ جۇرەتىنمىن. بۇل جولى ولجاس ولەڭدەرىن ءتارجىمالاۋعا بەلدى بەكەم بۋىپ، بىلەكتى سىبانىپ، قۇشىرلانا كىرىستىم. ولجاس جاي اقىن ەمەس، پسيحولوگ اقىن. ول ورىس وقىرماندارىنا نە كەرەك ەكەنىن وتە جاقسى بىلەدى. سوندىقتان ول قازاقتار، قازاق دالاسى، قازاق تاريحى، قازاقتىڭ وتكەن ءومىرى، كەرەك جەردە ەكزوتيكادان دا تارتىنبايدى. مىسالى، ماحامبەت تۋرالى ولەڭىندە باتىردىڭ ءبىر وتىرعاندا ءبىر قويدىڭ ەتىن ءبىر ءوزى جەپ قوياتىن ەدى دەيدى. باسقا حالىقتار ءۇشىن بۇل، ارينە، قىزىقتى، اسەرلى. ءبىراق قازاقتاردى ونىمەن ەلەڭدەتە المايسىڭ. سوندىقتان باسقاشا سۋرەت، باسقاشا بەينە، باسقاشا ارەكەت، ءبىر سوزبەن ايتقاندا، كوركەم بالاما ىزدەيسىڭ. ياكي ءتۇپنۇسقادان سانالى تۇردە اۋىتقيسىڭ. سول ولەڭنىڭ وسى تۇسىن مەن:

 ول دالانىڭ جولبارىسى، كوكجالى،

 كوكجال ءبورى قاي كەزدە دە ولجالى! - دەپ قازاقشالادىم. ءبىر قويدىڭ ەتىن ءبىر ءوزى جەۋ قاسقىردان اۋىسقان قاسيەت! قازاقتار سۇيسىنگەن ادامىن «ءوي، قاسقىرىم- اي!» دەيدى. ال ءبىر قويدىڭ ەتىن ءبىر ءوزى جەيدى دەسەڭ، ونى قوماعاي، مەشكەي دەپ ەسەپتەيدى. سونداي- سونداي باتىل ارەكەتتەردى دۇرىس بايقاعان بولۋى كەرەك، ءبىر كەزدەسكەندە مۇقاعالي مارقۇم ماعان:

- ءاي، قادىر! سەن ولجاستى جاقسىلاپ سۇندەتكە وتىرعىزىپسىڭ عوي! - دەدى. وسى سويلەمدەگى «سۇندەتكە وتىرعىزىپسىڭ عوي» دەگەن تىركەس كوپ ويدى، كوپ پىكىردى قامتىپ تۇر.

Massaget.kz