مەكتەپ پارتالارى قاۋىپسىزدىك ستاندارتتارىنا سايكەس كەلمەيدى - رومانوۆسكايا

بۇل تۋرالى ۇكىمەت وتىرىسىندا «تۇتىنۋشىلار ۇلتتىق ليگاسى» ۇيىمىنىڭ باسقارما ءتورايىمى سۆەتلانا رومانوۆسكايا ءمالىم ەتتى، دەپ حابارلايدى قازاقپارات.

«مەكتەپ جانە ۋنيۆەرسيتەت پارتالارىنا توقتالاتىن بولساق، ولار قاۋىپسىزدىك ستاندارتتارىنا سايكەس كەلمەيدى. كەزىندە ءماجىلىس مىنبەرىنەن دەپۋتاتتىق ساۋال جولداپ، سول كەزدە 70 پايىز مەكتەپتىڭ پارتالارى قاۋىپسىزدىك ستاندارتتارىنا ساي ەمەستىگى جونىندە ماسەلەسى كوتەرىلگەن بولاتىن. الايدا سودان بەرى ەشتەڭە وزگەرە قويعان جوق»، - دەدى رومانوۆسكايا. بۇدان بولەك، ول مەكتەپ فورماسى ماسەلەسىنە توقتالدى.

«مەكتەپ ديرەكتورلارى قاي فورمانى، كىمنەن جانە قانداي باعاعا ساتىپ الۋ كەرەكتىگىن نۇسقايتىنىن بىلەمىز. ءبىزدىڭ ويىمىزشا، وسى ارقىلى اتا-انالارعا تاۋار كۇشتەپ وتكىزىلەدى. بۇل رەتتە تۇتىنۋشىلار قۇقىقتارىن قورعاۋ زاڭناماسىن بۇزۋعا جول بەرىلەدى»، - دەيدى ول.

سونىمەن قاتار سۆەتلانا رومانوۆسكايا بالالار اتتراكسيوندارى ءتيىستى دەڭگەيدە تەكسەرىلمەي وتىرعاندىعىن اتاپ ءوتتى. وسى ورايدا بالالاردىڭ زاقىم الۋىنا بايلانىستى شاعىمدار سانى ازايماي وتىر. بۇدان بۇرىن حابارلانعانداي، تۇتىنۋشىلار ۇلتتىق ليگاسى كوسمەتيكالىق قىزمەتتەر مەن پلاستيكالىق حيرۋرگياعا شاعىمداناتىندار كوبەيگەندىگىن مالىمدەگەن ەدى.