استانانىڭ ميلليونىنشى تۇرعىنى ءبىر جاسقا تولدى

«قىزىم 3150 گرام سالماقپەن، 52 سانتيمەتر بويىمەن 2016 -جىلدىڭ 4 -شىلدەسى كۇنى استانا قالاسىنىڭ ءبىرىنشى پەريناتالدى ورتالىعىندا دۇنيە ەسىگىن اشتى. ءاۋ باستا ەشتەڭە تۇسىنبەي قالدىق: ءبىزدى باسقا پالاتاعا اۋىستىردى دا، قالا اكىمىنىڭ كەلەتىنىن ايتتى، - دەيدى اناسى ارايلىم مۇحامەديار. - قولىندا 25 راۋشان گۇلى بار اسەت يسەكەشەۆ ءبىزدىڭ پالاتاعا كىرىپ كەلىپ، سايدانىڭ استانانىڭ ميلليونىنشى تۇرعىنى ەكەنىن ايتىپ، ەكى بولمەلى پاتەردىڭ كىلتىن تابىس ەتتى. ال ءبىز جاتقان ورتالىقتىڭ ۇجىمى بالالاردىڭ تاماقتانۋىنا ارنالعان ۇستەل مەن پامپەرس سىيلادى. اكىم كەتىپ قالعاننان كەيىن دە ءبىراز ۋاقىت بۇل وقيعانىڭ راس- وتىرىگىنە كوزىمدى جەتكىزە الماي ابدىراپ قالدىم. بىزگە پاتەر كىلتى تابىستالعانى تۋرالى اقپارات سول ساتتە-اق ب ا ق پەن الەۋمەتتىك جەلىلەرگە تاراپ كەتتى. بارلىق تانىستار مەن دوستارىمىز قوڭىراۋ شالىپ، قۇتتىقتاي باستادى. مەن تەك باسىمدى يزەي بەردىم».

ارايلىم مەن ونىڭ وتباسى قىزدارىنىڭ ەسىمىن قوياردا وسى جايمەن بايلانىستىرىپتى. سايدا ەسىمى اراب تىلىنەن اۋدارعاندا «باقىتتى» نەمەسە «جولى بولعىش» دەگەن ماعىنانى بىلدىرەدى ەكەن.

«ونىڭ دۇنيە ەسىگىن اشقانىنىڭ ءوزى بىزگە باعا جەتپەس باقىت سىيلاعان. بۇعان قوسا پاتەرگە يە بولعانىمىز، ودان ءارى قۋانتا ءتۇستى. «كەمەنى قالاي اتاساڭ، سولاي جۇزەدى» دەگەن حالىقتىڭ ناقىلىنىڭ ءدال كەلگەنى عوي»، - دەيدى سايدانىڭ اناسى.

ارايلىم جاڭا تۋعان نارەستەلەردىڭ ەسەبى جۇرگىزىلىپ وتىرعانىن بىلمەگەن دە ەكەن. سىيعا تارتىلعان پاتەرگە سايدانىڭ ومىرگە كەلگەنىنە بەس اي تولعاندا كوشىپ كەلىپتى. جاڭا پاتەردىڭ قۇجاتتارىن ازىرلەپ، ءوز قالاۋلارىنشا جوندەپ تە العان. باقىتتان باسى اينالعان وتباسى اسەت يسەكەشەۆپەن تۇسكەن سۋرەتتى ينتەرنەتتەن تاۋىپ الىپ، ەستەلىك ءۇشىن شىعارىپ العان. سايدانىڭ جاسى بىرگە ەندى عانا تولىپ جاتسا دا، اناسى ونى «ناعىز ءارتىس» دەيدى.

جاس بوبەك ءاندى دە ايتادى، ءبيدى دە بيلەيدى.

«فلوماستەرلەرمەن سۋرەت سالۋدى وتە جاقسى كورەدى. ءبىراق، ۇستاعان زاتىن اۋزىنا سالا بەرەتىندىكتەن، قاۋىپتى- اۋ دەگەن زاتتاردى ۇستاتپايمىن. ومىرگە اكەلگەننەن كەيىن بىردەن قىزىمدى بالاباقشا كەزەگىنە تىركەپ قويدىم. سايدا 9 مىڭىنشى كەزەكتە تۇر. ءبىراق، ءوزىم دە بالاباقشادا جۇمىس ىستەيتىندىكتەن، بۇل جاعىنان ۋايىمداي بەرمەيمىن»، - دەيدى ارايلىم. وتباسى پاۆلودار قالاسىنان كوشىپ كەلگەن. استانادا كوشىپ كەلگەندەرىنە 15 جىلعا جۋىقتاپتى. جۇبايى ولجاس مۇحامەديار قوستاناي قالاسىنىڭ تۋماسى. ەلەكترومونتەر بولىپ ەڭبەك ەتەدى. وتباسى بەس بالانى دۇنيەگە اكەلۋدى جوسپارلاپ وتىر.