دەپۋتات مۇگەدەك بالا تاربيەلەپ وتىرعان اناعا كومەكتەسەتىنىن ايتتى - فوتو

كوكشەتاۋ. قازاقپارات - قازاقستان رەسپۋبليكاسى پارلامەنتى ءماجىلىسىنىڭ دەپۋتاتى، «نۇر وتان» پارتياسى فراكسياسىنىڭ مۇشەسى جانات وماربەكوۆا جۇمىس ساپارىمەن كوكشەتاۋ قالاسىندا بولدى، دەپ حابارلايدى «قازاقپارات» ح ا ا ءتىلشىسى.

ساپار بارىسىندا حالىق قالاۋلىسى الدىمەن كوكشەتاۋ قالاسىنىڭ سارى ارقا ىقشام اۋدانىندا سالىنىپ جاتقان 900 ورىندىق جاڭا مەكتەپتىڭ قۇرىلىسىمەن تانىستى. قۇرىلىس ۋچاسكەنىڭ باسشىسى سەرىك وسەربايەۆتىڭ ايتۋىنا قاراعاندا، ءبىلىم ورداسىن 2018 -جىلدىڭ ءۇشىنشى توقسانىندا پايدالانۋعا بەرۋ جوسپارلانعان. قازىرگى كەزدە نىساندا سۋ، كارىز جەلىلەرىن ورناتۋ جۇمىستارى اياقتالىپ، جىلۋ جانە ەلەكتر جەلىلەرى تارتىلۋدا. وسى كۇنى قۇرىلىستا 100 گە تارتا ادام جۇمىس ىستەۋدە.

الداعى ۋاقىتتا ولاردىڭ سانىن 200 گە جەتكىزۋ كوزدەلۋدە. دەپۋتات جۇمىسشىلارمەن جاسالعان كەلىسىمشارتتىڭ بولۋى، ولاردى ساقتاندىرۋ، مۇگەدەكتەرگە ارنالعان پاندۋستار، قوسىمشا شىعۋ ەسىكتەرى، ادامداردى جۇمىسقا جەرگىلىكتى جەردەن تارتۋ ماسەلەلەرىنە قاتىستى ساۋالدار قويدى. «قۇرىلىسشىلار كوبىنەسە ساقتاندىرۋ، كەلىسىمشارت جاساسۋ ماسەلەلەرىنە ونشا كوڭىل بولە بەرمەيدى. ونى جۇمىس بەرۋشىلەر دە قۇنتتامايدى. ازاماتتار ءوز قۇقىقتارىن بىلمەيدى. بارلىق جاعدايدىڭ زاڭ شەڭبەرىندە بولۋىن جۇمىس بەرۋشىلەر قامتاماسىز ەتۋلەرى ءتيىس. سوندا داۋلى ماسەلەلەر بولمايدى»، - دەدى ماجىلىسىمەن ءوز سوزىندە.

بۇدان كەيىن جانات وماربەكوۆ كوكشەتاۋدان كراسنويار سەلوسى باعىتىنداعى كۇرە جولدىڭ بويىندا قۇرىلىسى توقتاپ تۇرعان مەكتەپتىڭ جاعدايىمەن تانىستى. بۇل نىساننىڭ قۇرىلىسىن تولىق اياقتاۋ ءۇشىن 1 ميلليارد تەڭگەگە جۋىق قارجى قاجەت ەكەن.

ال، «نۇر وتان» پارتياسى وبلىستىق فيليالىنىڭ قابىلداۋىندا ازاماتتاردى جەكە ماسەلەلەرى بويىنشا قابىلداعان حالىق قالاۋلىسىنا كەلگەن كوكشەتاۋلىق تۇرعىنداردىڭ كوبى - تۇرعىن ءۇي كەزەگى ماسەلەسىن كوتەردى. ماسەلەن، جاسى الپىستى القىمداعان ءراشيدا قازبەكوۆا وسى كۇنى دەنساۋلىعىندا پسيحولوگيالىق جانە نەۆرولوگيالىق اۋىتقۋلارى بار بالاسىنا مەديتسينالىق قىزمەتتەردىڭ تولىق جاسالمايتىندىعى، ءدارى- دارمەكتىڭ قىمباتتىعى، وسىنداي اۋىر سىرقاتقا ۇشىراعاندارعا تۇرعىن ءۇي ءبولۋ كەزىندە نازار اۋدارىلمايتىندىعى تۋرالى ايتىپ، وكپە-رەنىشىن ءبىلدىردى. ون جىلدان بەرى پاتەر الۋ كەزەگىنىڭ ءالى كەلمەگەندىگىن ايتىپ، حالىق قالاۋلىسىنان كومەك سۇرادى.

بارلىق جاعدايدى تىڭداعان دەپۋتات ءتيىستى مەكەمەلەرگە تاپسىرما بەرىپ، ءوزى دە وسى ماسەلەنى باقىلاۋعا الاتىندىعىن، زاڭعا مۇگەدەكتەردىڭ دەڭگەيىنە بايلانىستى وزگەرتۋلەر ەنگىزۋگە ۇسىنىستار دايىندالاتىندىعىن ايتىپ، سەندىردى. سونىمەن قاتار، ءماجىلىس دەپۋتاتى كوكشەتاۋداعى «تىنىس» ا ق، «نوۆوپەك» ج ش س ءتارىزدى ءىرى ءوندىرىس ورىندارىندا بولىپ، ەڭبەك ۇجىمدارىمەن كەزدەستى.

اۆتور: اسلان وسپانوۆ