م. وزتۇرىكتىڭ شاكىرتى: قازاقستاننىڭ اتىنان الەم چەمپيوناتىنا قاتىسقىم كەلەدى

استانا. قازاقپارات - تاەكۆوندو تارلانى مۇستافا وزتۇرىكتىڭ ءتول شاكىرتى، ەۋروپا جانە الەم چەمپيوناتتارىنىڭ بىرنەشە دۇركىن چەمپيونى ءىلياس كەرىم كەلەسى جىلى قازاقستاننىڭ اتىنان الەم چەمپيوناتىنا قاتىسۋ ءۇشىن سوڭعى ءتورت جىل بويى تۇركيانىڭ اتىنان ەشبىر جارىستارعا قاتىسپاپتى.

 بۇل تۋرالى سپورت ساڭلاعى Baq.kz تىلشىسىنە بەرگەن سۇحباتىندا ايتتى.

«مەن قازاقستاننىڭ تاەكۆوندو سپورتىن دامىتۋ ءۇشىن بار كۇشىمدى سالعىم كەلەدى. كەلەسى جىلى وتەتىن الەم چەمپيوناتىندا قازاق ەلىنىڭ اتىنان قاتىسۋ ءۇشىن سوڭعى ءتورت جىل بويى تۇركيانىڭ اتىنان ەشبىر دوداعا قاتىسپادىم. ويتكەنى بۇل سالاداعى ءتارتىپ بويىنشا كەمىندە ءتورت جىل وزگە ەلدىڭ اتىنان جارىس ساحناسىنا شىقپاۋ ءتيىس ەكەن. سول مەرزىمدى تولتىردىم. ەكى ايدان بەرى قازاقستانداعى سپورتتىڭ وسى سالاسىنداعى ورىندارعا ءوتىنىش جاساپ، قۇجاتتارىمدى وتكىزىپ جۇگىرىپ ءجۇرمىن. قازاقستان تاراپى ءوتىنىشىمدى قۇپ كورەر دەپ ۇمىتتەنەمىن» ، - دەگەن تاەكۆوندوشى ءساتى تۇسسە 2020 -جىلى وتەتىن وليمپياداعا دا قازاق ەلىنىڭ اتىنان قاتىسقىسى كەلەتىنىن جەتكىزدى.

تۇركيانىڭ ستامبۇل قالاسىندا تۇراتىن قانداسىمىز بۇل كۇندە مۇستافا وزتۇرىك العاش اشقان سپورت مەكتەبىندە تاەكۆوندونىڭ بولاشاق چەمپيوندارىن تاربيەلەۋمەن اينالىسادى. ونىڭ بۇگىندە 70تەن اسا شاكىرتى بار. باپكەردىڭ الداعى ارمانىنىڭ ءبىرى سپورتتىڭ وسى ءتۇرىن مۇمكىندىگى شەكتەۋلى جاندارعا ۇيرەتۋ ەكەن.

«تاەكۆوندو - ۇزاق ۋاقىت پەن قايتپاس جىگەردى تالاپ ەتەتىن سپورتتىڭ قيىن ءبىر ءتۇرى. مەن ۇستازىم مۇستافا وزتۇرىكتەن ۇيرەنگەندەرىمدى قازاقتىڭ قارادومالاقتارىنا جەتكىزگىم كەلەدى. سوندىقتان كوبىنەسە ستامبۇلدىڭ ماڭىنداعى اعايىندارىمىزدىڭ بالالارىن جيناپ جۇرەمىن. بۇل - ءبىزدىڭ ۇلتتىق مىنەزىمىزگە جاقىن سپورت. ويتكەنى باسقا ۇلتتارعا قاراعاندا قازاقتىڭ بالالارى تاەكۆوندونىڭ تەحنيكاسىن تەز مەڭگەرەتىنىن بايقادىم. تاەكۆوندونى مۇگەدەك، مىلقاۋ بالالارعا دا ۇيرەتۋگە بولادى. ونىڭ دا بولەك تەحنيكاسى بار. مەنىڭ بىلۋىمشە، بۇل ادىسپەن مۇمكىندىگى شەكتەۋلى بالالاردى تاربيەلەپ جاتقان تۇركيادا دا ەشبىر شەبەر جوق سياقتى. سول ولقىلىقتىڭ ورنىن تولتىرۋ ءۇشىن ىم، يشارامەن ساباق بەرۋدى ۇيرەنىپ ءجۇرمىن. بولاشاقتا مۇگەدەك بالالاردىڭ باسىن قوسىپ، وزىمدەگى ونەردى ۇيرەتۋ ويىمدا بار» ، - دەيدى ءى. كەرىم.

 ءىلياس كەرىم - 1977 -جىلى 29 - قاڭتاردا تۇركيانىڭ زەيتۇنبۇرىن اۋدانىندا ومىرگە كەلگەن. مۇستافا وزتۇرىكتەن 6 جاسىنان باستاپ ونەر ۇيرەنگەن سپورت شەبەرى 2006 -جىلى سەۋلدە وتكەن الەم چەمپيوناتىنىڭ جانە 2001 -جىلى گەرمانيادا، 2005 -جىلى فينليانديادا وتكەن ەۋروپا چەمپيوناتىنىڭ چەمپيونى. تاەكۆوندودان قارابەلبەۋ 6 دان يەگەرى.

 

مايگۇل سۇلتان