ق ر پرەمەر-ءمينيسترى سىر وڭىرىندەگى ساپارىندا ايماقتاعى ىستەرگە وڭ باعا بەردى

قىزىلوردا. قازاقپارات -  قىزىلوردا وبلىسىندا جۇمىس ساپارىمەن قازاقستان رەسپۋبليكاسىنىڭ پرەمەر-ءمينيسترى باقىتجان ساعىنتايەۆ باستاعان ۇكىمەتتىك دەلەگاتسيا بولدى.

ونىڭ قۇرامىندا ق ر پرەمەر-ءمينيسترى كەڭسەسىنىڭ باسشىسى، ينۆەستيتسيالار جانە دامۋ، دەنساۋلىق ساقتاۋ، ەڭبەك جانە حالىقتى الەۋمەتتىك قورعاۋ، قارجى، مادەنيەت جانە سپورت، قورعانىس جانە اەروعارىش ونەركاسىبى مينيسترلەرى، سونداي-اق، ءبىرقاتار مەملەكەتتىك ورگانداردىڭ جانە دامۋ ينستيتۋتتارىنىڭ جەتەكشىلەرى بار.

وبلىس اكىمى قىرىمبەك كوشەربايەۆ ۇكىمەت باسشىسىن ايماقتىڭ الەۋمەتتىك-ەكونوميكالىق دامۋى تۋرالى قۇلاعدار ەتتى. سونىمەن بىرگە ۇكىمەتتىك دەلەگاتسيا ءوڭىردىڭ ءبىراقاتار ماڭىزدى نىساندارىن ارالادى.

الدىمەن  قىزىلوردا سۋ تورابىندا بولعان ۇكىمەت مۇشەلەرى مەملەكەت باسشىسىنىڭ تاپسىرماسىمەن كوكتەمگى تاسقىن سۋدى جيناقتاۋ جانە سۋارمالى جەرلەردىڭ اۋماعىن ۇلعايتۋ بويىنشا اتقارىلىپ جاتقان جۇمىستارمەن تانىستى.

ايماقتىڭ دەنساۋلىق ساقتاۋ جانە ءبىلىم بەرۋ جۇيەسىنىڭ دامۋىمەن ق ر پرەمەر-ءمينيسترى 300 ورىنعا ارنالعان وبلىستىق كوپسالالى بالالار اۋرۋحاناسىن جانە «نۇر-شۇعىلا 2» جەكەمەنشىك بالاباقشاسىن ارالاۋ بارىسىندا تانىستى.

مۇنان سوڭ ۇكىمەت باسشىسى بۇگىندە ءارتۇرلى باعىتتار بويىنشا 289 ءتۇرلى قىزمەت ءتۇرىن ۇسىنىپ وتىرعان كاسىپكەرلەرگە قىزمەت كورسەتۋ ورتالىعىندا بولدى. جۇمىس ساپارىنىڭ اياسىندا وبلىس ەكونوميكاسىن جاڭعىرتۋ ماسەلەلەرىنە ارنالعان جيىن ءوتتى.

قىرىمبەك كوشەربايەۆ ايماقتا مەملەكەت باسشىسىنىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى قازاقستان حالقىنا جولداۋىندا بەلگىلەنگەن تاپسىرمالاردى جۇزەگە اسىرۋ ءۇشىن بارلىق كۇش-جىگەر جۇمىلدىرىلىپ، نەگىزگى سالالاردى تەحنيكالىق قايتا جاراقتاۋ، ەڭبەك ونىمدىلىگىنىڭ دەڭگەيىن ارتتىرۋ، باسەكەگە قابىلەتتى ەكسپورتتىق ءونىمدى دامىتۋ شارالارى قولعا الىنىپ جاتقانىن اتاپ ءوتتى.

«وڭدەۋ سەكتورىنداعى ءوندىرىس كولەمى %9,4 عا ءوستى، بۇل رەسپۋبليكانىڭ ورتاشا كورسەتكىشىنەن جوعارى. مەملەكەت باسشىسىنىڭ تەحنولوگيالىق دامۋدى جەدەلدەتۋ جونىندەگى تاپسىرماسى بويىنشا وبلىستا يندۋستريالاندىرۋ باعدارلاماسى اياسىندا 6 كاسىپورىن گازدى پايداعا جاراتاتىن، ەلەكتر ەنەرگياسىن وندىرەتىن، كۇكىرت قىشقىلىن شىعاراتىن جانە ءسۇت وڭدەيتىن جاڭا تەحنولوگيالىق قوندىرعىلاردى ىسكە قوستى.

ماسەلەن، «ارال تۇز» ا ق كاسىپورنى يسپاندىق جاڭا تەحنولوگيا بويىنشا جۇمىس اتقارۋدا. بۇل ەكسپورت كولەمىن 40 ەسە ۇلعايتۋعا مۇمكىندىك بەردى. سوڭعى 2 -جىلدا كاسىپورىن رەسەيدىڭ اس تۇزى نارىعىنىڭ %12 ىنا يە بولدى»، - دەدى قىرىمبەك كوشەربايەۆ.

وبلىس اكىمىنىڭ ايتۋىنشا بيىل ايماقتا ەكسپورتقا باعىتتالعان ەكى بىردەي كاسىپورىندى ىسكە قوسۋ جوسپارلانۋدا. ولار - موليبدەن ءۇش توتىعىن وندىرەتىن كاسىپورىن جانە شىنى زاۋىتى. اتاپ وتەرلىگى، موليبدەن توتىعى تولىقتاي جاپونياعا ەكسپورتقا جونەلتىلەدى. ال، شىنى زاۋىتى بويىنشا ينۆەستورلار قازىردىڭ وزىندە جوبانىڭ ەكىنشى كەزەڭىن: كۇن باتارەيالارىنا، سمارتفوندار مەن پلانشەتتەرگە ارنالعان ۋلترا جىڭىشكە شىنى شىعارۋدى تالقىلاۋدا.

سونىمەن قاتار، باقىتجان ساعىنتايەۆقا  قىزىلوردا قالاسى سىرداريا وزەنىنىڭ سول جاق جاعالاۋىنداعى قۇرىلىس جوباسى تانىستىرىلدى.

بۇل جەردە 18 كوپقاباتتى (778 پاتەر) تۇرعىن ۇيدەن تۇراتىن العاشقى مولتەك اۋداننىڭ، 320 ورىندىق بالاباقشانىڭ جانە باسقا دا نىسانداردىڭ قۇرىلىسى قارقىندى ءجۇرىپ جاتىر. تۇستەن كەيىن ق ر پرەمەر-ءمينيسترى جاڭاقورعان اۋدانىنداعى «شالقيا» قورعاسىن-مىرىش كەن ورنىنا بارىپ، شاحتاعا ءتۇسىپ، كەنىشتى قايتا جاڭعىرتۋ جۇمىستارىنىڭ بارىسىمەن، ونىڭ دامۋ پەرسپەكتيۆاسىمەن، سونداي-اق، تاۋ-كەن بايىتۋ كومبيناتى قۇرىلىسىنىڭ باستالۋىمەن تانىستى. كەن ورنىندا «تاۋ-كەن سامۇرىق» اق مەن ەۋروپالىق قايتا قۇرۋ جانە دامۋ بانكى (ە ق د ب) اراسىندا تاۋ-كەن بايىتۋ كومبيناتىنىڭ قۇرىلىسىن قارجىلاندىرۋ جونىندەگى كەلىسىمگە قول قويىلدى. 1500 جۇمىس ورنىن قۇرۋعا مۇمكىندىك بەرەتىن بۇل كاسىپورىن 2018-جىلى ىسكە قوسىلادى دەپ جوسپارلانعان.

وسى جەردە ۇكىمەت باسشىسى شىعارماشىلىق زيالى قاۋىم وكىلدەرىمەن جۇزدەستى. ساپار قورىتىندىسى بويىنشا باقىتجان ساعىنتايەۆ مۇناي ءوندىرۋ كولەمىنىڭ ازايعانىنا قاراماستان ايماقتا وڭدەۋ ونەركاسىبى، اۋىل شارۋاشىلىعى، جاپپاي ورتا بيزنەس بەلسەندى دامىپ، الەۋمەتتىك سالا مەن تۇرعىن ءۇي قۇرىلىسى بارىنەن دە كوپ قارجىلاندىرىلىپ وتىرعانىن اتاپ ءوتتى.

اۆتور: ەلۋباي اۋەزوۆ