جوندەۋدى قاجەت ەتەتىن جولداردى كومپيۋتەرلىك باعدارلاما انىقتايدى

استانا. قازاقپارات - ق ر ينۆەستيتسيالار جانە دامۋ مينيسترلىگى اۆتوموبيل جولدارى كوميتەتىنىڭ ءتوراعاسى مەرەكە پىشەمبايەۆتىڭ ايتۋىنشا، قازاقستاندا جولداردىڭ ساپاسىنا جاۋاپ بەرەتىن ۇلتتىق ورتالىق قۇرىلادى.

وعان بارلىق وبلىستىق جول زەرتحانالارى كىرەتىن بولادى. وسىلايشا، جۇمىستىڭ سانىنا ەمەس، ساپاسىنا باسا نازار اۋدارىلادى. بۇل - دۇنيەجۇزى بانكىنىڭ تالابى، دەپ حابارلايدى قازاقپارات ءتىلشىسى.

 «ول ورتالىق قالاي جۇمىس ىستەيدى؟ ماسەلەن، بۇگىندە قاي جولداردى جوندەيتىنىمىزدى كۇزگى تەكسەرىستەرگە سۇيەنىپ انىقتاساق، ەندىگى كەزەكتە ونى ارنايى باعدارلاما انىقتايتىن بولادى. ول باعدارلاماعا جولدارعا قاتىستى سوڭعى ون جىلدىڭ بارلىق مالىمەتتەرى ەنگىزىلەدى. سونىڭ نەگىزىندە جوندەۋ جۇمىستارىن قاجەت ەتەتىن جولدار انىقتالادى. وسىعان بايلانىستى بارلىق شارالاردى جىلدىڭ اياعىنا دەيىن اياقتاۋ قاجەت. ءسويتىپ، كەلەسى جىلدان باستاپ ۇلتتىق ورتالىق ءوز قىزمەتىنە كىرىسۋى ءتيىس»، - دەيدى پىشەمبايەۆ.

ايتا كەتەيىك، بۇگىن استانادا وتكەن باسپا ءسوز ءماسليحاتىندا كوميتەت باسشىسى تاعى 11 جولدا قۇرىلىس جۇمىستارىنىڭ باستالاتىنىن مالىمدەدى. ونىڭ ايتۋىنشا، ءۇش جىلدان كەيىن اقىلى جولداردان 30 ميلليارد تەڭگە جينالادى.

اۆتور: ارمان اسقاروۆ