ارگەنتينادا ەسىرتكى تاسىمالداعان ۇشاقتى اتىپ ءتۇسىردى
استانا. قازاقپارات - ارگەنتينالىق كۇش قۇرىلىمىنىڭ قىزمەتكەرلەرى بورتىندا بىرنەشە سەنتنەر ماريحۋانا تيەلگەن ەسىرتكى ساۋدالاۋشىلاردىڭ ۇشاعىن اتىپ ءتۇسىردى، دەپ حابارلايدى Terra Argentina اگەنتتىگى ەلدىڭ قاۋىپسىزدىك ءمينيسترى پاتريسيو بۋللريچكە سىلتەمە جاساپ.
جاندارمەريا قىزمەتكەرلەرىنە اۋە ارقىلى ەسىرتكى كونترابانداسىنىڭ تاسىمالى تۋرالى جەدەل اقپارات تۇسكەن.
كۇش قۇرىلىمىنىڭ قىزمەتكەرلەرى بۋەنوس- ايرەس پروۆينتسياسىنداعى دۋگگان قالاسىنىڭ ايماعىنا قونعان ۇشۋ اپپاراتىن ۇستادى.
پوليتسيا قىزمەتكەرلەرى وق جاۋدىرعانىمەن، ۇشقىش ۇشاقتىڭ زاقىمدانعانىنا قاراماستان جوعارى كوتەرىلدى. ال 32 شاقىرىم ۇشقاننان كەيىن، ۇشقىش اۆاريالىق قونۋدى ىسكە قوسىپ، ءوزى جاسىرىنىپ ۇلگەرەدى.
اۋە كەمەسىنىڭ بورتىنان پوليتسيا قىزمەتكەرلەرى 455 كەلى ماريحۋانا تاپتى. ءمينيستردىڭ مالىمەتىنشە، تاركىلەنگەن ەسىرتكى پارتياسىنىڭ قارا بازارداعى قۇنى شامامەن 910 مىڭ دوللاردى قۇرايدى. «ءشوپ» پاراگۆايدان اۋە ارقىلى جەتكەن دەگەن بولجام بار.
تەكسەرۋ بارىسىندا التى ادام ۇستالدى، الايدا ولاردىڭ قاتارىندا ۇشقىش جوق بولىپ شىقتى.
