بەلگىلى كينوتانۋشى باۋىرجان نوگەربەك ومىردەن وزدى

باۋىرجان رامازان ۇلى نوگەربەك 1948-جىلى 6- تامىزدا قاراعاندى وبلىسى  ۇلىتاۋ اۋدانى  ۇلىتاۋ اۋىلىندا دۇنيەگە كەلگەن.

1989-جىلى ونەرتانۋ عىلىمىنىڭ كانديداتى، 1999-جىلى قازاقستاننىڭ ەڭبەك سىڭىرگەن قايراتكەرى اتاعىن الدى.

1971-جىلى ماسكەۋ قالاسىنداعى مەملەكەتتىك كينەماتوگرافيا ينستيتۋتىنىڭ كينوتانۋ فاكۋلتەتىن پروفەسسور ن. پ. تۋمانوۆانىڭ جەتەكشىلىگىمەن ءتامامداعان. 1981-1985-جىلدارى قازاقستان كينەماتوگرافياشىلار وداعى باسقارماسىنىڭ حاتشىسى بولعان.

1993-جىلدان قازىرگى قازاق ۇلتتىق ونەر اكادەمياسىندا قىزمەت ەتىپ، 2001-جىلدان باستاپ كافەدرا مەڭگەرۋشىسى قىزمەتىن اتقارعان.

ول قازاق مۋلتيپليكاتسيالىق كينو سالاسىن («ەرتەگىلەرگە ءتىل بىتكەندە». قازاقستاننىڭ مۋلتيپليكاتسيالىق كينوسى، 1984)، سونداي-اق كينو ونەرىنىڭ كوكەيكەستى ماسەلەلەرىن («قازاقستان كينوسى»، 1998) زەرتتەۋمەن شۇعىلداندى.

عۇمىرىنىڭ كوپ بولىگىن ونەر سالاسىنا ارناعان قايراتكەر ەل جادىندا ماڭگى قالاتىنى انىق.