قىتايلىق جانكۇيەرلەر ديماشتىڭ كونتسەرتىنە قالاي دايىندالىپ جاتىر
وزدەرىن «ديماشتىڭ قاناتى» دەپ تانىستىرعان جانكۇيەرلەر توبىنىڭ 50 گە تارتا مۇشەسى استاناعا 25 - ماۋسىم كۇنى بەيجىڭ قالاسىنان جينالىپ، «ەير استانا» اۋە كومپانياسىنىڭ بەيجىڭ- استانا باعىتىنداعى اۆيارەيسى ارقىلى جەتكەن. توپتىڭ جەتەكشىسىنىڭ ايتۋىنشا، توپ مۇشەلەرىنىڭ قولداۋىمەن ولار كونسەرتكە قۇنى 60 مىڭ تەڭگە تۇراتىن ديماشتىڭ ەسىمى جازىلعان 6 مەترلىك جانە كىشكەنتاي باننەرلەر جاساتىپ الىپ كەلگەن. بۇدان سىرت، قىتايلىق جانكۇيەرلەر اتىنان ساۋعا رەتىندە قازاقتىڭ دومبىراسى بەينەلەنگەن كىلتكە تاققىشتار جانە ارنايى جاسالعان «باستاۋ» شىعارماشىلىق كەشتىڭ توسبەلگىسىن الا كەلگەن.
«مەن قىتايدىڭ حۋنان پروۆينسياسى چانشا قالاسىنان كەلدىم. چانشا ديماشتىڭ ارمانىنىڭ باستالعان جەرى. بۇگىن ديماشتىڭ تۋعان جەرىندە بولىپ، ونىڭ شىعارماشىلىق كەشىن كورۋ مەن ءۇشىن ۇلكەن قۋانىش» ، - دەدى توپ جەتەكشىسى حان يۋۋانيۋۋان.
ايتا كەتەيىك، «باستاۋ» كونتسەرتى ەكسپو-2017 حالىقارالىق كورمەسى اياسىندا 27 - ماۋسىم كۇنى ەلورداداعى «استانا ارەنا» ستاديونىندا وتەدى. ديماش قۇدايبەرگەن كونسەرتكە قاتىساتىن انشىلەردى كوپشىلىككە جاريالاعان بولاتىن. ولار - قىتايدىڭ بەلگىلى ءانشىسى تەرري لين، ەۆروبايقاۋ-2012 بايقاۋىنىڭ جەڭىمپازى لورين (شۆەتسيا) ، ۇلىبريتانيا ءانشىسى سوفي ەليس بەكستور، كريستينا ورباكايتە (رەسەي) جانە قازاقستاننىڭ ەڭبەك سىڭىرگەن ءارتىسى، وپەرا ءانشىسى مايرا مۇحامەد قىزى.
اۆتور: مۇحتار قاليموللا ۇلى
