جەتى بالامەن كوشە كەزگەن كەلىنشەككە قايىرىمدى جاندار ءۇي سالىپ بەرمەك
استانا. قازاقپارات - 7 بالاسىن جەتەكتەگەن باتىر اناعا جۇرت جۇمىلا كومەكتەسىپ جاتىر. شيەتتەي بالا- شاعامەن كوشە كەزگەن كەلىنشەك جايىندا وتكەن جۇمادا عانا كورسەتىپ ەدىك، دەپ حابارلايدى ك ت ك تەلەارناسى.
جومارت جانداردىڭ ارقاسىندا، شىنار سارسەنبايەۆانىڭ ءومىرى ەكى كۇندە وزگەرىپ شىعا كەلدى. بالا-شاعانىڭ كوز جاسىنا بەي-جاي قاراي الماعان جاندار 2 جارىم ميلليون تەڭگە جيناپ بەرىپ، پاتەر جالداپ بەرگەن. ءتىپتى، باسىبايلى جاڭا ءۇي سالىپ بەرۋدىڭ قامىنا كىرىسكەن اتىمتاي- جومارتتار بار. كوپتەن بەرى تويا تاماق ىشپەي، كوڭىلدەرى ەندى كوتەرىلگەن جانۇيانىڭ جايىن ايدا ماعىپار ايتسىن.
بۇل وتباسىنىڭ قيىن جاعدايى قايىرىمدى جانداردى ەلەڭ ەتكىزبەي قويمادى. كوشەدە اس ءىشىپ، ءشوپ اراسىندا تۇنەگەن شيەتتەي بالا-شاعانى ارنامىزدان كورگەندار قولدان كەلەر كومەگىن ارقالاپ وسىندا اعىلىپتى. ءىشىپ-جەم، كيىم-كەشەك، ءتىپتى 3 ايعا پاتەر دە جالداپ بەرگەن.
«ماعان ك ت ك- دان كورگەن، ينتەرنەت قاراعان كىسىلەر كەلىپ كەرەكتى قاراجات، ازىق- تۇلىك، كيىم، كورپە ساتىپ الىپ بەردى. ەندى ماتراس تا ساتىپ الىپ بەرەمىز، توسەك قاراستىرامىز دەپ وتىر. ءبىر كىسىلەر ۇستەل دە الىپ كەلدى. راحمەت ولارعا»، - دەيدى شىنار سارسەنبايەۆا.
ءتىپتى، قايىرىمدى جانداردىڭ ءبىرى بۇل وتباسىعا باسىبايلى ءۇي سالىپ بەرۋگە كىرىسكەلى وتىر. ال وعان دەيىن جالدامالى بولسا دا 7 بالانىڭ جاتار ورنى، ىشەر اسى بار. ءبىر كۇندە بۇلاي ومىرلەرىنىڭ وزگەرەتىنىن ويلاماعان وتباسىنىنىڭ العىستان باسقا ايتارى جوق.
«ەندى مەن ءوزىمنىڭ سەزىمىمدى ايتىپ جەتكىزە المايمىن، قاتتى تولقىپ قۋانىپ جاتىرمىن. اياق استى بولىپ كەتتى. راحمەت سىزدەرگە كوپ، ك ت ك ارناسىنا دا راحمەت، وسىلاي كومەكتەسكەندەرىڭىزگە. بۇيىرتسا ءۇيدى سالىپ بولعان سوڭ بارلىعىنىزدى قوناققا شاقىرامىز»، - دەيدى شىنار سارسەنبايەۆانىڭ قىزى سىمبات سارسەنبايەۆا.
قازىردىڭ وزىندە قايىرىمدى جاندار 2 جارىم ميلليون تەڭگە جيناپ بەرگەن. دەگەنمەن، قارجىلاي كومەك بەرەردە ساق بولعان ءجون. ويتكەنى، شىنار سارسەنبايەۆانىڭ اتىن پايدالانىپ، اقشا تاپقىسى كەلگەن الاياقتار دا شىعىپتى. سوندىقتان، قول ۇشىن بەرمەس بۇرىن، باتىر انانىڭ وزىمەن الدىن الا حابارلاسىپ العان ابزال.
