باعدات سامەدينوۆا: قازىرگى ەر ازاماتتار ءوز جاۋاپكەرشىلىگىن سەزىنبەيدى

كۇيەۋى قول كوتەرىپ، قايىن اپكەلەرى كۇن كورسەتپەگەن ەكەن. ءانشى بۇل جولى ەر ازاماتتاردىڭ جاۋاپكەرشىلىكتىڭ نە ەكەنىن تۇسىنبەيتىنىن تىلگە تيەك ەتتى.

بۇل تۋرالى «ايەل باقىتى» باعدارلاماسىندا ايتىلدى.

«ەر ادامنىڭ ءوز مىندەتىن بىلمەۋىنە قاتىستى كوپ اڭگىمە قوزعالادى. ءبىراق، بۇدان ەش ناتيجە جوق. قازىر زامان سولاي بولىپ كەلە جاتىر. ەر ازاماتتار ءوزىنىڭ جاۋاپكەرشىلىگىن از سەزىنەدى. ءبارى سىرتقا، جان-جاققا قارايدى. ارتىنشا بارىندە وسىنداي جاعداي بولىپ جاتقانىنا كوز جەتكىزەدى. ىشتەي «ماعان نەگە ولاي جاساماسقا؟» دەپ ويلايدى. بۇدان وزگە كەرەمەت جالقاۋلىقتارى بار. كوپ ۇرىس-كەرىس وسىدان باستاۋ الادى. كەي ازامات، ءتىپتى، ايەلىنىڭ بازاردا ىستىققا كۇيىپ، سۋىققا توڭىپ تۇرىپ تاپقان تابىسىن وزىنە جاراتادى. مۇندايدا ار-ۇيات ماسەلەسىن شەتكە ىسىرىپ قويادى. ءبىزدىڭ ۇلكەن كىسىلەرىمىز «ءوز ايەلىڭدى اسىراي الماساڭ، نەسىنە ۇيلەنەسىڭ؟!» دەپ ايتىپ وتىرادى»، - دەيدى باعدات سامەدينوۆا.

وسى ورايدا، باعدارلاما جۇرگىزۋشىسى ءلايلا سۇلتان قىزى انشىدەن ءوزىنىڭ اكەسى تۋرالى سۇراپ كوردى. الايدا ءانشى ول كىسىنىڭ ەرتەرەكتە قايتىس بولىپ كەتكەنىن ايتىپ، اكەسىنە قاتىستى ءتىس جارمادى.

«مەنىڭ اكەم جاس كەزىندە قايتىس بولىپ كەتكەن. ول كىسىنىڭ سىرتىنان ەشنارسە ايتا المايمىن. ومىردەن ءوتتى، كەتتى. ول كەزەڭ باسقا كەزەڭ بولاتىن. ۇلكەن كىسىلەر ەر ادامدارعا وزدەرىنىڭ مىندەتى تۋرالى كوبىرەك ايتىپ وتىراتىن. كىشكەنە بولسىن، ۇيات پەن جاۋاپكەرشىلىك بولۋشى ەدى. ەگەر ءسوزىنىڭ سالماعى بار كىسىلەر ەسكەرتۋ ايتىپ وتىرسا، ەر ازاماتتار مۇنداي ىسكە بارمايدى. ال قازىر مۇلدەم ۇيالمايدى. قۇددى دۇكەنگە بارا جاتقانداي. قىزدار دا «ۇيلەنسەك، ۇيلەنەرمىز. ۇيلەنبەسەك، ءبىر بالا تۋعان سوڭ اجىراسىپ كەتەرمىز» دەپ جاتادى. مەنىڭشە، ىلعي كىنانى ايەلگە جابا بەرگەن دۇرىس ەمەس. ول بەيشارا نە ىستەي الادى؟ ەركەگى اقشاسىن تاۋىپ بەرىپ، ءوزىن الاقانىنا سالىپ ايالاپ وتىرسا، ول قايدا كەتەدى؟ سول ءۇيدىڭ بالاسىنا قاراپ، كۇيەۋىن ماپەلەپ وتىرادى ەمەس پە؟!» - دەيدى ءانشى.

وسى ورايدا، قازاقستاندىق زاڭگەر كۇيەۋىنەن ماتەريالدىق تۇرعىدا قامقورلىق كورمەگەن ايەلدەرگە مەملەكەت تاراپىنان قانداي كومەك كورسەتىلەتىنىن ايتىپ ءوتتى.

«زاڭ بويىنشا، 10 جاسقا دەيىنگى بالالار كوپ جاعدايدا اناسىنىڭ قولىندا قالادى. ال 10 جاستان كەيىنگى بالالارعا تاڭداۋ قۇقىعى بەرىلەدى. ياعني اكەسىنە نەمەسە شەشەسىنە باراتىنىن ءوزى تاڭدايدى. ەر-ازاماتتارعا اليمەنت تولەۋ جۇكتەلەدى. ولاردىڭ قۇقىقتارى جالپى بىردەي. ەگەر اليمەنتتەن باس تارتسا، ونى قاساقانا تولەمەي قويسا، اكىمدىك، قىلمىستىق جاۋاپكەرشىلىككە تارتىلادى. ودان كەيىن جالعىزباستى انا رەتىندە تىركەلگەندەرگە الەۋمەتتىك قامسىزداندىرۋ بار. جارتىلاي وتباسىلاردى ۇيمەن، الەۋمەتتىك جاردەماقىلارمەن قامتاماسىز ەتەدى. مەديتسينالىق ساقتاندىرۋلار تەگىن بەرىلىپ، بالاباقشا مەن مەكتەپتەن جەڭىلدىكتەر بەرىلىپ وتىرادى»، - دەيدى اينۇر ماحمەتوۆا.