كينو: ءومىر، ادام، دامۋ

ءتۇرلى فانتاستيكالىق، ەكشن جانرىنداعى فيلمدەرگە سۇرانىس ارتتى. وسىلايشا، كينو الەمىنىڭ وزىندە عالامات تەحنولوگيالاردىڭ ءوزىق ۇلگىسىن كورە باستادىق. ايىنا ءبىر رەت كينوتەتارعا بارماساق، ءوزىمىزدى الدەنەدەن قۇر قالعانداي سەزىنەتىن جاعداي جەتتىك. كينوماتوگرافيا سالاسىنىڭ نەگىزگى مىندەتى -  ادام ساناسىنا جاقسىلىقتى جەتكىزۋ، ولاردىڭ رۋحاني قالىپتاسۋىنا اسەر ەتۋ. ءبىراق جارناما، باسەكە، پيار سەكىلدى ۇعىمدارمەن استاسىپ بۇل مىندەتتەردىڭ بارلىعى «پايدا تابۋ» دەگەن تۇسىنىكپەن الماستىرىلدى. ال ەندى وسى فيلمدەردىڭ، كوز الدىڭىزدا كورگەن وقيعا جەلىسى مەن كەيىپكەردىڭ ارەكەتتەرى ءسىزدىڭ ادام بولىپ قالىپتاسۋىڭىزعا قالاي اسەر ەتەدى؟ ويلانىپ كوردىڭىز بە؟

جاعىمسىز فيلمدەر قايىرىمسىز دوس ىسپەتتەس. ۋاقىتىڭىزدى الادى، كوڭىل- كۇيىڭىزدى تۇسىرەدى. ءبىراق، ەش نارسە بەرمەيدى. كينونىڭ ناعىز جاۋى -  ءىس پىستىرارلىق سيۋجەت. بۇل فيلمنەن الارىڭىز بولسا دا، سەزىمىڭىز اقىلىڭىزدى تۇنشىقتىرىپ تاستادى. ال كينونىڭ وتىمدىلىگىن ارتتىراتىن نارسە -  وقيعا جەلىسىنىڭ وتكىرلىگى. ءسىزدىڭ ويلاۋ كوكجيەگىڭىزدىڭ داميتىنى سونشالىقتى، ءسىز وقىعان كەز كەلگەن دۇنيەڭىزدى ءوز ويىڭىزدا كينوعا اينالدىراسىز. بۇل دا فيلمنىڭ سىزگە تيگىزگەن اسەرى. كورگەن فيلمىڭىزدى بولاشاقتا ساناڭىز وتكەن ءومرىڭىز رەتىندە قابىلداۋى مۇمكىن. تاڭعالماڭىز. كينو ومىردەن الىنادى. ارينە، كەيدە اسىرىپ جەتكىزگەنمەن، ءومىردىڭ ناعىز بەينەسى كورسەتىلەدى. تەك ومىردەگىدەن الدەقايدا جەڭىل قابىلدايسىز. كينو باقىتتى بولۋعا، ماحابباتقا سەنۋگە، قورقىنىشىڭدى جەڭۋگە كۇرەسۋگە ۇيرەتەدى. كەيدە قىلمىسقا بارۋعا دا يتەرمەلەيدى. ومىردە ەشنارسە تەك اقتان تۇرمايدى. «اتتەگەن- ايى» مىندەتتى تۇردە تابىلادى. كەيدە كينوتەاتردا وتىرىپ، ۋاقىتڭىزدىڭ قالاي زۋ ەتىپ ءوتىپ كەتكەنىن بايقاماي قالاسىز با؟ دەمەك، ءسىز جاقسى كينونىڭ كۋاگەرى بولدىڭىز. قۇتتىقتايمىز.

 ۇمىتپاڭىز، جۇلدىزدار اسپاندا بولادى. ال ەكرانداعى جاقسى اكتەرلار. كينو جامان نارسەگە ۇيرەتپەۋى ءتيىس، كەرىسىنشە جاماننان جيرەنۋگە ۇگىتتەۋى كەرەك. ال بۇگىنگى فيلمدەرگە قاراپ ولاي دەپ ويلامايسىز. سولاي ما؟ كينو زەيىندى جاتتىقتىرادى. وزگە نارسەگە الاڭداماي ناقتى جۇمىسپەن اينالىسۋعا ماجبۇرلەيدى. كوپ رومانتيكالىق فيلم قاراماڭىز. ويتكەنى ومىردە ولاي بولمايتىنىنا كوزىڭىز جەتكەندە قايمىعىپ قالاسىز. فانتاستيكالىق فيلمدەر ارمانداۋعا ۇيرەتەدى. بارلىق فيلمنىڭ باقىتتى اياقتالاتىنى قۋانتادى، ويتكەنى، جاقسىلىقتىڭ جەڭەتىنىن وسىلايشا دالەلدەيدى. ۇزاق سەريالداردى قاراۋ ءۇشىن ءومىر تىم قىسقا. ودان دا 2 ساعاتىڭىزدى قيىپ، ومىرلىك ءمانى بار فيلم قاراڭىز.

Massaget.kz