ك ح د ر يادرولىق جانە راكەتالىق سىناقتارعا موراتوريدىڭ شارتتارىن اتادى
استانا. قازاقپارات - امەريكا قۇراما شتاتتارى پحەنياننىڭ بارلىق شارتتارىن ورىندايتىن بولسا (ولاردىڭ اراسىندا امەريكالىق- وڭتۇستىك كورەيالىق تۇراقتى اسكەري جاتتىعۋلاردى توقتاتۋ بار)، ك ح در يادرولىق جارىلعىش زاتتار مەن بالليستيكالىق زىمىرانداردىڭ سىناعىن وتكىزۋگە موراتوري جاريالاۋى مۇمكىن،
دەپ حابارلايدى قازاقپارات ت ا س س اگەنتتىگىنە سىلتەمە جاساپ.
بۇل تۋرالى سارسەنبى كۇنى ءۇندىستانداعى ك ح د ر ەلشىسى كە چحون يەن ءۇندىنىڭ WION تەلەارناسىنا بەرگەن سۇحباتىندا ءمالىم ەتتى.
«بەلگىلى ءبىر شارتتار بويىنشا يادرولىق جانە راكەتالىق سىناقتارىمىزعا موراتوري قويۋ تۋرالى ماسەلەنى تالقىلاۋعا دايىنبىز. مىسالعا، ەگەر امەريكالىق تاراپ ءىرى اسكەري جاتتىعۋلاردى ۋاقىتشا نەمەسە تۇراقتى نەگىزدە توقتاتاتىن بولسا، وندا ءبىز دە ۋاقىتشا توقتاتامىز. كورەيلىك ماسەلەنى بەيبىت تۇردە قالاي شەشۋگە بولاتىنىن تالقىلايىق»، - دەپ اتاپ ءوتتى ءۇندىستانداعى ەلشى.
مامىر ايىنىڭ باسىندا ا ق ش پرەزيدەنتى دونالد ترامپ Bloomberg جاڭالىقتار قىزمەتىنە بەرگەن سۇحباتىندا، ەگەر ونىڭ پايداسى بار دەپ شەشەتىن بولسا، ك ح د ر كوشباسشىسى كيم چەن ىنمەن كەزدەسۋگە ءازىر ەكەندىگىن ايتقان بولاتىن. دەگەنمەن، ەكى كۇننەن كەيىن ا ق ش- تىڭ مەملەكەتتىك حاتشىسى رەكس تيللەرسون امەريكالىق تاراپتىڭ شارتتارى بويىنشا قولايلى جاعدايلار تۋىنداعان كەزدە عانا ۆاشينگتون پحەنيانمەن كەلىسسوزدەردى وتكىزۋگە دايىن بولاتىنىن ەسكەرتىپ وتكەن بولاتىن. وڭتۇستىك كورەيانىڭ پرەزيدەنتى مۋن چجە ين كورەيا تۇبەگىندەگى يادرولىق تۇيىتكىلدەر بويىنشا التىجاقتى كەلىسسوزدەردى قايتا جانداندىرۋ قاجەت دەپ سانايدى جانە بۇعان ا ق ش پەن جاپونيانى كوندىرە الاتىنىنا ءۇمىتتى. الايدا پحەنيان دا قادامدار جاساۋى ءتيىس.
اۆتور: ميرا تولەندى قىزى
