قانات يسلام سىن ايتۋشىلارعا جاۋاپ بەردى
«سىن تۇزەلمەي، ءمىن تۇزەلمەيدى» دەيدى اتام قازاق. نەگىزى، ءوزىمىز سىنشىل حالىقپىز عوي. سىن ايتقان ادامدارعا كوپ راقمەت! ارينە، مىقتىنى جەڭە الماساڭ، مىقتى سپورتشى بولا المايسىڭ. ءبىراق مەن ءاربىر قارسىلاسىمدى وزىمنەن تومەن، وزىمنەن ءالسىز دەپ باعالامايمىن. سوسىن تىڭدايتىن سىن جانە تىڭدامايتىن سىن بار عوي. سەنىڭ كاسىبىڭە، يا بولماسا، باپكەرىنە قاتىستى سىن ايتىلسا، ونىمەن كەلىسۋگە، كەلىسپەۋگە بولادى. كەز كەلگەن سالادا سىن ايتىلادى. مەن ءوزىم سىندى دۇرىس قابىلدايمىن. ويتكەنى، ءاربىر جەكپە- جەكتەن كەيىن وسال تۇستارىمدى وزگەرتۋگە تىرىسامىن» ، - دەيدى قانات يسلام.
بوكسشىنىڭ ايتۋىنشا، ءاربىر قارسىلاستى كاسىبي بوكستىڭ شىڭىنا اپاراتىن باسپالداق رەتىندە قاراستىرۋ قاجەت. «ماعان سالسا، ەرتەڭ- اق كەز كەلگەن چەمپيونمەن شىعۋعا دايىنمىن. ءبىراق وعان قارسى شىعۋ ءۇشىن ولاردىڭ بەرگەن قارسىلاستارىنان ءوتۋ كەرەك. سول سەبەپتى الداعى ۋاقىتتا مىقتى قارسىلاستار بولادى. سوعان تاياپ قالدىق. قازىرگى كەزدە مەن WBO، WBA مەن IBF بويىنشا الەمدىك ۇشتىكتە- تورتىكتە تۇرمىن. سوندىقتان چەمپيوندىق اتاق تا الىس ەمەس. اللا بۇيىرسا، مىقتى قارسىلاستارمەن كەزدەسەمىن. ارينە، ول ءۇشىن ەڭبەكقورلىق تا، سابىر قاجەت» ، - دەپ اتاپ كورسەتتى بوكسشى.
ايتا كەتەيىك، قانات يسلام - WBO Intercontinental مەن WBA Fedelation بەلبەۋلەرىنىڭ يەگەرى. قازاقستاندىق بوكسشى استاناداعى ەكسپو-2017 كورمەسى اياسىندا 9 -قىركۇيەكتە كەزەكتى جەكپە- جەگىن وتكىزۋدى جوسپارلاپ وتىر. ونىڭ كەلەسى قارسىلاسى - ا ق ش بوكسشىسى دجەيمس كيركلەند. الداعى ۋاقىتتا قازاقستاندىق بوكسشى گەننادي گولوۆكينمەن جۇمىس ىستەپ جاتقان نۆو ارناسىمەن كەلىسىمشارتقا وتىرۋى ابدەن مۇمكىن.
اۆتور: ارمان اسقاروۆ