تارازدا قازبا جۇمىستارى كەزىندە التىننان قۇيىلعان باعالى بۇيىمدار تابىلدى - فوتو

ول جەردەن ايەل ادامنىڭ التىن اشەكەيدەن قۇيىلعان بۇيىمدارى تابىلدى، - دەپ جازدى Stan.kz سايتىنىڭ وڭىردەگى ءتىلشىسى.

 العاشقى قويما 2015 - جىلى تابىلعان بولاتىن. قويما «كونە - تاراز» قالاسىنىڭ ورتالىق داڭعىل جولىنىڭ سولتۇستىك بولىگىنەن تابىلعان. ونى ارشۋ بارىسىندا ىشىنەن ايەل ادامعا ءتان اسىل بۇيىمدار، اشەكەيلەر شىققان.

 التىن سىرعا، كۇمىستەن جاسالعان بىلەزىكتەر، 2 تۇمار، ونىڭ ءبىرى جاس ءوسپىرىم قىزعا ارنالعانى كورىنىپ تۇر. مامانداردىڭ كەلتىرگەن بولجامدارى بويىنشا ول قاراحانيد ءداۋىرىنىڭ زەرگەرلەرىمەن دايىندالۋى مۇمكىن.

 
ياعني، اسىل بۇيىمدار 10-12 - عاسىرلارعا ءتان. ارحەولوگتار الداعى ۋاقىتتا وعان عىلىمي تۇرعىدا زەرتتەۋ جۇمىستارى جۇرگىزىلگەن سوڭ، ناقتى ۋاقىتىن ايتۋعا بولادى دەپ وتىر. ال ازىرگە قولدا بار دەرەكتەر بويىنشا، اسىل بۇيىمدار تراگەديالىق جاعدايدا جاسىرىلعان بولۋى كەرەك.

 «قازبا جۇمىستارى بارىسىندا انىقتالعانداي، قويمانىڭ بەتىندە شامامەن 30 سم جانعان اعاش قالدىقتارى، كىرپىش سىنىقتارى بولدى. ءبىزدىڭ پايىمداۋىمىزشا بۇل 12- عاسىردا ورىن العان جاۋگەرشىلىك كەزىندە جاسىرىلىپ، قالىپ قويعان»، - دەيدى «قازارحەولوگيا» ج ش س باس عىلىمي قىزمەتكەرى اسقار ءابىلدين.