ەكىباستۇزدا ءماشھۇر ءجۇسىپ كوپەي ۇلىنا ەسكەرتكىش قويىلدى
استانا. قازاقپارات - ۇلى ويشىل، فولكلورتانۋشى، ەتنوگراف، تاريحشى، فيلوسوف، قازاق مادەنيەتى مەن ادەبيەتىنىڭ بەلگىلى تۇلعاسى ءماشھۇر ءجۇسىپ كوپەي ۇلىنا ارنالعان ەسكەرتكىش ەكىباستۇز قالاسىنا كىرەبەرىستەگى اقىننىڭ ەسىمىمەن اتالاتىن كوشەدە ورناتىلدى.
ەسكەرتكىشتىڭ اشىلۋى شاھاردىڭ 60 جىلدىق مەرەيتويىنا ورايلاستىرىلعان. قولادان قۇيىلعان مونۋمەنتتىڭ بيىكتىگى تۇعىرىمەن بىرگە التى مەتردەن اسادى. مۇسىنشىلەر جاۋباسار مەن جارىلعاسىن يعلانبەك ۇلى بۇل جۇمىسقا ءبىر جىلداي ۋاقىت جۇمساعان.
«ىسكە كىرىسپەن بۇرىن ءبىز ءماشھۇر ءجۇسىپتىڭ ءومىرىن تەرەڭنەن زەرتتەدىك. ول وتە جان- جاقتى ادام بولعان» ، - دەيدى جاۋباسار يعلانبەك ۇلى.
ال وبلىس اكىمى بولات باقاۋوۆ بۇگىنگى ۇرپاققا باي مۇرا قالدىرعان ۇلى تۇلعانى قۇرمەت تۇتۋى كەرەك ەكەنىن اتاپ ءوتتى. «وتكەنى جوقتىڭ بولاشاعى دا بولمايدى. قازاقتاردىڭ توقشىلىقتا ءومىر سۇرەتىنىن ءماشھۇر ءجۇسىپ كوپەي ۇلى ايتىپ كەتكەن. بۇگىندە ءبىز شىنىمەن دە مولشىلىقتا ءومىر سۇرۋدەمىز» ، - دەدى بولات باقاۋوۆ.
ەسكەرتكىشتىڭ اشىلۋ سالتاناتىنا ءماشھۇر ءجۇسىپ كوپەي ۇلىنىڭ نەمەرەسى زاراۋحا شاراپيەۆا، شوبەرەسى اباي شاراپيەۆ تە قاتىستى. پاۆلودار وبلىسىنىڭ اكىمى بولات باقاۋوۆپەن بىرگە مونۋمەنتتىڭ بەتىندەگى ماتانى قازاقتىڭ ۇلى زەرتتەۋشىسىنىڭ شوبەرەسى اباي شاراپييەۆ اشتى.
«مەنىڭ اتا- انام ءماشھۇر ءجۇسىپ اتامنىڭ تالاپ قويا بىلەتىن ادام بولعانىن ايتاتىن. ول ەڭبەك ەتكەن قاراپايىم ادامداردى قاتتى سىيلاعان. باياناۋىلدا ونىڭ ۇستالىقپەن اينالىسقان دوستارى وتە كوپ بولعان. ولاردىڭ تورىندە مەنىڭ اتام ءاردايىم قوناق رەتىندە قۇرمەتكە بولەنگەن» ، - دەيدى اباي شاراپيەۆ. شارا بارىسىندا مەكتەپ وقۋشىلارى ءماشھۇر ءجۇسىپ كوپەي ۇلىنىڭ بىرنەشە شىعارماسىن ورىنداپ، سوڭىنان ەسكەرتكىشكە گۇل شوقتارى قويىلدى.
اۆتور: قانات مامەتقازى ۇلى
