ەلوردادا تاكسي جۇرگىزۋشىلەرىنە تالاپ كۇشەيتىلەدى

استانا. قازاقپارات - استانانىڭ تاكسوموتورلى پاركتەرى قىزمەت كورسەتۋ ساپاسىن جاقسارتۋ ماقساتىندا جۇرگىزۋشىلەردى قىزمەتكە الاردا كليەنتتەرمەن دۇرىس قارىم-قاتىناس جاساي ءبىلۋ، قالانى جاقسى تانىپ، باعدارلاۋ سىندى ءبىرقاتار تالاپتارعا باسىمدىق بەرمەك، دەپ حابارلايدى قازاقپارات ەلوردا اكىمدىگىنىڭ مەديا-ورتالىعىنا سىلتەمە جاساپ.

«بۇگىندە كانديداتتاردى ىرىكتەۋدە تالاپ ءبىر قالىپتا: كولىك جۇرگىزۋ ءوتىلى كەم دەگەندە 5 جىل بولۋى كەرەك، تاكسي قىزمەتىندەگى ەڭبەك ءوتىلى جانە ەلوردانىڭ كورىكتى جەرلەرى مەن كوشەلەرىن جاقسى تانۋى»، - دەيدى استانا كولىك قىزمەتكەرلەرى قاۋىمداستىعىنىڭ ءتوراعاسى مەدەت قۇرمانوۆ.

م. قۇرمانوۆتىڭ ايتۋىنشا، اتالعان تالاپتاردان تىس، بولاشاق جۇرگىزۋشىلەر تاكسي قىزمەتىنىڭ ەرەكشەلىكتەرى مەن پسيحولوگيالىق فاكتورلاردى دا ەسكەرۋلەرى ءتيىس.

«ءارتۇرلى كليەنتتەر كەزدەسەدى، سول سەبەپتەن ولاردىڭ ارقايسىمەن جەكە قارىم-قاتىناس جاساپ ۇيرەنۋگە بەيىمدەلۋ قاجەت»، - دەدى ول.

استانا كولىك قىزمەتكەرلەرى قاۋىمداستىعى ءتوراعاسىنىڭ ايتۋىنشا، ەكسپو كورمەسى قارساڭىندا ءبىرىڭعاي تاكسي قىزمەتىنىڭ جۇرگىزۋشىلەرىنە قىزمەت كورسەتۋدىڭ مادەنيەتى بويىنشا قىسقا كۋرستار وتكىزىلدى.

«ارينە، بۇل جەتكىلىكسىز. استانا كولىك ماماندارىنىڭ بىلىكتىلىگىن ارتتىرۋ ورتالىعىندا ءبىزدىڭ جۇرگىزۋشىلەر تاسىمالداۋ ءۇردىسىنىڭ بارلىق تالاپتارىن: قالا كوشەلەرىن جاقسى بىلۋدەن باستاپ، ءوزىن ۇستاۋ ادەبىنە دەيىن ۇيرەنەتىن بولادى»، - دەدى م. قۇرمانوۆ.

ەستەرىڭىزگە سالايىق، ەكسپو-2017 مامانداندىرىلعان حالىقارالىق كورمەسى باستالعاننان بەرى استانادا تاكسي جۇرگىزۋشىلەرى تاراپىنان تاريف قۇنىن نەگىزسىز وسىرگەن ەكى فاكتى تىركەلدى. ۆەنگريا تۇرعىنى اۋەجايدان قالانىڭ وڭ جاق جاعالاۋىنا دەيىنگى ارالىققا 40 مىڭ تەڭگە تولەسە، ال گەرمانيا ازاماتى وسىنداي ارالىق جەرگە قالتاسىنان 19 مىڭ تەڭگە ساناپ بەرگەن. ەكى جاعداي بويىنشا دا تاكسيستەر تابىلدى، تۋريستەرگە اقشا كەرى قايتارىلدى.