قازاق كۇرەسىنەن قاراتۇياعىمنان حال كەتكەنشە كەتپەيمىن - ايبەك نۇعىماروۆ

استانا. قازاقپارات - قازاقستاندا قازاق كۇرەسىنەن تۇڭعىش رەت ءتورت دۇركىن الەم چەمپيونى اتانعان جالعىز بالۋان بار. ول - شىعىس قازاقستان وبلىسىنىڭ تۋماسى ايبەك نۇعىماروۆ.

ەل بىرىنشىلىگىندە سان مارتە توپ جارعان ول ەلباسى جۇلدەسى ءۇشىن ءداستۇرلى تۇردە ۇيىمداستىرىلىپ كەلە جاتقان «قازاقستان بارىسى-2013» ءتۋرنيرىنىڭ جەڭىمپازى.

بيىل ايبەك وسىمەن جەتىنشى مارتە بەدەلى بيىك دودادا باق سىناعالى وتىر. وسىعان وراي بالۋاننىڭ وزىمەن تىلدەسىپ، بيىلعى دوداعا دايىندىق بارىسىمەن تانىسىپ ەدىك.

- ايبەك، «قازاقستان بارىسى» ءتۋرنيرى جاقىنداپ قالدى. دايىندىعىڭىز قالاي؟

- وتە جاقسى دايىندالىپ جاتىرمىن. قازىر سەمەيدىڭ ىرگەسىندە ءبىر اۋىلدا جاتتىعىپ جاتىرمىن. ءبارى جاقسى.

- بۇيىرسا، جەڭىس تۇعىرىنان كورىنەم دەگەن ۇمىتتەسىز عوي؟

- ارينە، جەڭىس ءۇشىن جاتتىعىپ جاتىرمىن. جەڭىلەيىن دەپ ەشكىم جارىسقا بارمايدى عوي. بار ماقساتىم - جەڭىس تۇعىرىنىڭ ەڭ بيىك ساتىسىنان كورىنۋ.

- وسى بالۋانداردىڭ ىشىندەگى ەڭ تاجىريبەلىسى ءسىز بولارسىز. سەبەبى، وسى تۋرنير باستالعالى جىل سايىن قاتىسىپ كەلەسىز...

- قازاقتا «باعىڭ مەن بابىڭ قاتار شاپسىن» دەگەن ادەمى ءسوز بار. كەيدە قانشا تاجىريبەلى بولساڭ دا، باعىڭ شاپپاسا ءبارىبىر ساتسىزدىككە ۇرىناسىڭ. ءبىراق، نەگىزىنەن تاجىريبە ءبىرىنشى ورىندا بولاتىنى ءسوزسىز.

- قارسىلاستارىڭىزدىڭ بارلىعى وزىڭىزگە ۇيرەنشىكتى بالۋاندار بولار؟

- سولاي دەۋگە بولادى. ءبىراق، سوڭعى جىلدارى وزگە وبلىستاردان مىقتى-مىقتى جاس بالۋاندار شىعىپ جاتىر. سوندىقتان وڭاي قارسىلاستار جوق.

- دەسە دە، بالۋانداردىڭ ىشىندە «وسىنى ۇتسام ءارى قاراي وڭاي بولار» دەگەن باستى قارسىلاسىڭىز بار شىعار؟

- جوق، مەن ءۇشىن بارلىق قارسىلاس بىردەي. ءالى كىممەن بەلدەسەتىنىمىز دە بەلگىسىز. جەرەبە تارتىلعاننان كەيىن بارىپ، ناعىز قارسىلاستارىمىز تۋرالى ايتۋعا بولادى.

- 2013-جىلى «قازاقستان بارىسى» اتاعىن جەڭىپ العانداعى قۋانعان ءساتىڭىزدى ءالى ۇمىتپاعان بولارسىز؟

- ول كۇن ەستەن قالاي ءوشسىن. بيىل دا سول جەتىستىكتى قايتالاپ، تاعى ءبىر مارتە شاتتىقتىڭ قۇشاعىندا تەربەلسەم دەگەن ءتاتتى ارمانىم بار.

- جوعارى دا ايتىپ وتتىك، بيىل تۋرنيرگە جەتىنشى مارتە قاتىسقالى وتىرسىز. وسى ارالىقتا تورەشىلەردىڭ شەشىمىنە نارازى بولعان ساتتەرىڭىز بولدى ما؟

- جوق. تورەشىلەر جولىمدى بوگەپ، بۇرا تارتقان ەمەس. التى جىلدىڭ بىرەۋىندە چەمپيون بولسام، قالعان بەسەۋىندە ءوزىمنىڭ جىبەرگەن قاتەلىكتەرىمنەن قارسىلاستارىما ەسە جىبەردىم. بيىل سول قاتەلىكتەرگە بوي الدىرماي، كەتكەن ەسەمدى قايتاراتىن بولامىن.

- بەيبىت ىستىبايەۆ ءۇش دۇركىن «بارىس» اتانسام بولدى دەپ ەدى. اتاندى، بيىل ءوز ەركىمەن قاتىسۋدان باس تارتىپتى. ال سىزدە نەشە دۇركىن چەمپيون اتانۋ جوسپارىڭىزدا بار؟

- مەن وسىعان دەيىن وزىمە ونداي ناقتى تالاپ قويماپپىن. ءوزىم سپورتقا كەشىگىپ كەلگەنمىن. 17 جاسىمدا ۇلكەن سپورتتى باستادىم. ەندى سپورتتان كەشىگىپ كەتسەم دەگەن ويدامىن. قازاق كۇرەسىنەن قاراتۇياعىمنان حال كەتكەنشە كەتپەيمىن. مەن - قازاق كۇرەسىنە كەشىگىپ كەلسەم دە الەمدى ءتورت رەت باعىندىرعان جالعىز قازاقپىن. ماقساتىم - قازاق كۇرەسىن الەمگە تانىتۋ.

- اڭگىمەڭىزگە راحمەت! ساتتىلىك بولسىن...

اۆتور: كۇنسۇلتان وتارباي