سەرىكبول سايلاۋبەك جۇرتتى كۇلدىرەمىن دەپ ءبىر ايلىق جالاقىسىنان قاعىلعان

استانا. قازاقپارات -  «وۋ، جەڭگە» دەپ قازاقتىڭ تويىندا بۇكىل جەڭگەلەردى بيلەتىپ جۇرگەن سەرىكبول انشىلىكتەن بۇرىن داياشى بولىپ قىزمەت ەتكەنىن ايتتى.

ءتىپتى، باراحولكا بازارىندا اناسىنىڭ ورنىنا ساتۋشى دا بولىپ، تالاي دوستارىن تۇسكى اسپەن قامتاماسىز ەتكەن.

بۇل تۋرالى ءانشىنىڭ ءوزى stan.kz تىلشىسىنە ايتىپ بەردى.

ستۋدەنت كەزىندە كۇن كورۋ ءۇشىن ەمەس، قىدىرۋ ءۇشىن داياشى قىزمەتىنە باردىم دەيدى سەرىكبول ساۋلاۋبەك. تالاي ادامعا جەم بولىپ، اسىن تولەمەي كەتەتىن الاياقتار ءۇشىن ءبىر اپتالىق ايلىعىن دا الا الماعان كۇندەرى بولعان.

«داياشى بولىپ جۇرگەنىمدە مەن وتە كوڭىلدى اداممىن عوي. تاپسىرىستى تاباقپەن ويناتىپ اكەلەتىنمىن. سوندا ءبىر ىدىستى قۇلاتىپ، شىنىلاردى سىندىرىپ، ءبىر ايلىعىمدى بەرگەنىم بار. ودان كەيىن كەلۋشىلەرگە كوپ الداندىم. اقشاسىن تولەمەي قاشىپ كەتەتىندەر بولدى. ولار ءۇشىن ءبىر اپتالىق ايلىعىمنان قاعىلدىم. كادىمگىدكەي تولەمەي قاشىپ كەتەدى عوي» ، - دەپ ءبىر كۇلىپ الدى ءانشى.

داياشىدان سوڭ سەرىكبول بازاردا بالالار كيىمدەرىن ساتقان. ساۋداسى دا جاقسى بولعان سياقتى. ويتكەنى، كۇنىنە 30 مىڭ تەڭگەنىڭ كيىمىن ساتىپ قالتاسىنا باسىپ وتىرىپتى. ويتكەنى، اناسىنىڭ ءوز كاسىبى ەكەن.

«انامنىڭ زاتتارى بولدى. سول ءۇشىن اقشانى ەمىن ەركىن وڭدى سولدى جۇمسادىم. كۇنىنە 30 مىڭ تەڭگە تۇسسە، جۇمىستان سوڭ ونى وزىمە جاراتاتىنمىن. اسىرەسە دوستارىممەن قىدىرىپ قۇرتىپ قوياتىنمىن. مەنەن ساۋداگەر شىقپادى» ، - دەيدى سەرىكبول.

ال، ءومىرقۇل اينيازوۆ ءبىر قاپ پيازدى بەس تەڭگە ءۇشىن كوتەرىپ جۇك تاسۋشى بولعان كۇنىن ەسىنە ءتۇسىردى.

«ستۋدەنت ەدىم. ەندى ول كەزدە قازىرگىدەي ەمەس، اۋىلداعى اتا- انامىزبەن التى ايدا ءبىر حابارلاساتىنبىز. ولاردا ىزدەمەيتىن. ال اقشا كەرەك. تاۋەلسىزدىك العان جىلدارى عوي. قيىن قىستاۋ زامان. جاتاقحاناعا ءبىر كىسىلەر كەلىپ ءبىر كاماز پياز بار تۇسىرەتىن جىگىتتەر بولسا دەسە، سول جىگىتتەردىڭ الدىندا مەن تۇراتىنمىن. سوندا ءبىر قاپتى بەس تەڭگەگە كوتەرىپ، تاسىپ بەرەمىز» ، - دەيدى ءومىرقۇل اينيازوۆ.