چىڭ لۇڭنىڭ استاناعا كەلگەنى ءۇشىن ەش قارجى شىعىنداعان جوقپىز - ەرلان قارين
بۇل تۋرالى ەرلان قارين ينستاگرامداعى پاراقشاسىندا حابارلادى.
«نەگىزى اكتەر تەك قىتاي كينوسى فەستيۆالىنىڭ اشىلۋىنا قاتىسۋى ءتيىس بولعان، الايدا ول بىزگە كىشىپەيىلدىلىك تانىتتى. ءبىزدىڭ جولىمىز بولىپ، از عانا ۋاقىتتىڭ ىشىندە باسپا ءسوز ءماسليحاتىنا قاتىسىپ، باعدارلاماعا («تۇنگى ستۋديا» باعدارلاماسى-رەد.) ءتۇسىپ ۇلگەردى. ءبارى سوڭعى ساتتە اياقاستى بولدى»، - دەپ جازادى «قازاقستان ر ت ر ك» ا ق باسقارماسىنىڭ ءتوراعاسى.
ودان بولەك، ەرلان قارين اكتەردىڭ استاناعا كەلۋى ءۇشىن قازاقستان تاراپى ەش قارجى شىعىنداماعانىن جازادى.
«ول دوستارىمەن بىرگە ءوزىنىڭ جەكە ۇشاعىمەن ۇشىپ كەلدى. ەشكىم وعان ەشقانداي گونورار تولەگەن جوق، ول دا ەشقانداي «رايدەر» ۇسىنبادى. ءتىپتى قىمبات كولىكپەن كۇتىپ الۋدان باس تارتىپ، دوستارىمەن بىرگە قالا ىشىندە ءجۇرۋ ءۇشىن قاراپايىم مينيۆەن سۇرادى. استانالىق رەستوراتورلار ونىڭ كەلگەنىنە ريزا بولعانى سونشالىق، كەشكى اس ءۇشىن ءبىز ءبىر تيىن دا تولەمەدىك. ول قازاقستاندا ءبىر- ەكى كۇن بولادى دەپ جوسپارلانعان ەدى، الايدا ۋاقىتتىڭ ازدىعىنا بايلانىستى اكتەر جارتى كۇن عانا بولدى»، - دەپ ءمالىم ەتتى.
سونداي- اق، اۆتور بار شىعىن قۇرمەتتى قوناققا سىيلانعان كادەسىيلار مەن ەكسپو- نىڭ بيلەتتەرى بولعانىن ايتادى. ءسوز سوڭىندا ەرلان قارين دجەكي چانمەن بولعان كەزدەسۋدەن العان اسەرىمەن ءبولىستى:
«دجەكي وتە قاراپايىم، مەيىرىمدى، شىنايى جانە كوڭىلدى ادام ەكەن. ءتىپتى بىرگە سۋرەتكە تۇسكىسى كەلگەن ەشبىر جاننىڭ كوڭىلىن قالدىرعان جوق. ازىلدەسىپ، كۇلىپ ءجۇردى. جۋىردا تاعى دا قازاقستانعا كەلەتىنىن ايتتى. ول جولى بىرلەسكەن جوبالاردى جۇزەگە اسىرۋ ءۇشىن بۇدان كورى ۇزاعىراق ۋاقىتقا كەلمەك. ءبىز، ارينە، تاعاتسىزدانا كۇتەمىز».
ەسكە سالا كەتەيىك، الەمدىك اكتەر، كاسكاديەر، كينورەجيسسيەر، كينوپروديۋسەر، سسەناريست، كومپوزيتور، ميلليونداعان كورەرمەننىڭ سۇيىكتىسىنە اينالعان اڭىز ادام - دجەكي چان 7 - ماۋسىمدا استاناعا العاش رەت كەلدى. شارانىڭ باستى ۇيىمداستىرۋشىلارى - «قازاقستان» رەسپۋبليكالىق تەلەراديوكورپوراتسياسى مەن ق ح ر باسپاءسوز، باسپا، راديو، كينو جانە تەلەۆيزيا ءىسى جونىندەگى مەملەكەتتىك باسقارماسى.
اۆتور: ەربول جانات
