چىڭ لۇڭ كىمدى ءپىر تۇتاتىنىن ايتىپ بەردى

استانا. قازاقپارات - الەمگە ايگىلى اكتەر دجەكي چان جاستايىنان چارلي چاپلين، باستەر كيتون سىندى اكتەرلاردى ءپىر تۇتقانىن، سولارعا قاراپ بوي تۇزەگەنىن ايتتى. ول بۇل جونىندە «قازاقستان» ۇلتتىق تەلەارناسىنىڭ «تۇنگى ستۋديا» باعدارلاماسىنداعى سۇحباتى بارىسىندا ءمالىم ەتتى،

 دەپ حابارلايدى قازاقپارات ءتىلشىسى.

 الەمگە ايگىلى اكتەر نۇرلان قويانبايەۆقا بەرگەن سۇحباتى بارىسىندا قازاقستان جايلى پىكىرىن دە ءبىلدىردى.

«مەنىڭشە قازاقستان مۇحيتقا تىكەلەي شىعا المايتىن ۇلكەن مەملەكەت. گاز بەن مۇنايعا باي. تابيعاتى دا تاماشا. جىلقى ەتى جانە قىمىز»، دەگەن دجەكي چان الداعى ۋاقىتتا دا ءتۇرلى كينوعا ءتۇسىپ، كورەرمەندەرىن قۋانتا بەرەتىنىن جەتكىزدى.

«مەنى كينوعا تۇسۋىمە شابىتتاندىراتىن، جىگەرلەندىرەتىن بۇكىل الەمدەگى جانكۇيەرلەرىم. سوندىقتان مەن كينو ءتۇسىرۋدى جالعاستىرا بەرەمىن. قاي ەلگە بارسام دا ءسىزدىڭ كينولارىڭىزدى كوردىم دەگەن ءسوزدى ءجيى ەستيمىن. ماعان وسىدان 10 جىل بۇرىن سىزدەردىڭ ەلشىلەرىڭىز قازاقستاننىڭ سۋرەتىن كورسەتكەن بولاتىن. سول ۋاقىتتا بىرلەسكەن جوبانى جۇزەگە اسىرۋدى جوسپارلادىق. مەنىڭ كومانداما قازاقستاندى ءتۇسىرىلىم الاڭى رەتىندە زەرتتەۋگە تاپسىرما بەرگەن ەدىم. ءبىراق ولار كەلە المادى. ەندى مىنە سىزدەردىڭ ەلدەرىڭىزگە ءوزىم كەلىپ وتىرمىن»، - دەدى اكتەر.

 سونداي- اق دجەكي چان قازاق جەرىندە كينوعا تۇسۋگە قارسى ەمەستىگىن ايتتى.

 «ارينە، قىزىق بولار ەدى. بۇگىننەن باستاپ سىزدەرمەن كينو ءتۇسىرۋدى جوسپارلايمىن»، دەگەن اكتەر حالىقتىڭ قوشامەتى مەن قولداۋىنا ريزا بولىپ، شەكسىز العىسىن ءبىلدىردى.

 ەسكە سالا كەتسەك، ، الەمگە تانىمال اكتەر جۋىردا قازاقستانداعى قىتاي كينوسى فەستيۆالى اياسىندا استاناعا كەلگەن ەدى. ەلورداعا ساپارى بارىسىندا دجەكي چان باسپا ءسوز ءماسليحاتىنا قاتىسىپ، قازاقستاندىق جۋرناليستەردىڭ ساۋالدارىنا جاۋاپ بەردى، فەستيۆالدىڭ اشىلۋ سالتاناتىندا ءان شىرقادى. سونداي- اق، «قازاقستان» ۇلتتىق ارناسىنداعى «تۇنگى ستۋديادا نۇرلان قويانبايەۆ» توك- شوۋىنا تۇسكەن بولاتىن.

اۆتور: سامال قابىشيەۆا

دجەكي چانمەن سۇحبات 14:50 مينۋتتا