تالانتتى قازاق بوكسشىسى كاسىبي بوكستىڭ شىڭىن باعىندىرماقشى - فوتو
الدىمەن ءسوز العان ۆيكتور لەونيد ەلىمىزدەگى كاسىپقوي بوكس دەڭگەيىنىڭ قارقىندى تۇردە دامىپ كەلە جاتقانىن تىلگە تيەك ەتتى.
«پروموۋتەرلىك كومپانيالاردىڭ قاتارى كوبەيىپ، قازاق بوكسشىلارىنا ۇلكەن جەكپە-جەكتەر وتكىزەتىن مۇمكىندىك ارتا ءتۇستى. اسىرەسە ايدار شارىبايەۆ سەكىلدى جىگىتتەرگە جول اشىپ جۇرگەن وتاندىق «Diamond RING» پروموۋتەرلىك كومپانياسىنىڭ الەمدىك بەدەلى دە جوعارى. سوندىقتان بىزدەر الداعى كۇندەرى ەكسپو اياسىندا وسى «Diamond RING» كومپانياسىنىڭ ۇيىمداستىرۋىمەن ۇلكەن كەزدەسۋلەرگە كۋا بولۋىمىز عاجاپ ەمەس»، - دەيدى ول.
ايدار شارىبايەۆتا الداعى ماقسات-جوسپارلارىمەن ءبولىستى. كاسىپقوي رينگتەگى التىنشى جەڭىسىنەن كەيىن ءسال تىنىعىپ العان بوكسشى دايىندىق جۇمىستارىنا قايتا كىرىستى. شارىبايەۆ كەلەسى جەكپە-جەگىن چەمپيوندىق بەلبەۋ ءۇشىن وتكىزۋى ابدەن مۇمكىن. قارسىلاسى ازىرگە بەلگىسىز.
«مەن بارلىق كەزدەسۋلەرگە ۇلكەن جاۋاپكەرشىلىكپەن قارايمىن. ماياميدە مىقتى بوكسشىلارمەن، بىلىكتى باپكەرلەرمەن جۇمىس جاسادىم. قازاق كاسىپقوي بوكسشىلارىنا وسىنداي جاعداي جاساپ وتىرعان وتاندىق «Diamond RING» پروموۋتەرلىك كومپانياسىنا العىسىم شەكسىز. ماقسات بىرەۋ، باعىت ايقىن. الەم چەمپيونى اتانىپ، ەل ابرويىن اسقاقتاتۋ»، - دەيدى ول.
