كەزەكتە تۇرعان الماتىلىقتار ۋنيۆەرسيادا اۋىلىنان پاتەرلەر الدى
باسپانا «نۇرلى جەر» باعدارلاماسى اياسىندا بەرىلدى. پاتەر كىلتتەرىن قالا اكىمى باۋىرجان بايبەك تابىستادى، دەپ حابارلايدى قازاقپارات.
ايتا كەتۋ كەرەك، تۇرعىن ءۇي كەشەنى ۋنيۆەرسيادا كەزىندە سالىنعان اتلەتتەر اۋىلىندا ورنالاسقان. «نۇرلى جەر» باعدارلاماسى بويىنشا بەرىلگەن پاتەرلەر «قازاقستان يپوتەكالىق كومپانياسى» ا ق ارقىلى راسىمدەلىپ، ساتىپ الۋ قۇقىعىمەن 168 ادامعا جالعا بەرىلدى.
«ەلباسى تاپسىرماسى بويىنشا ۋنيۆەرسيادا مۇراسى رەتىندە بۇگىن پاتەرلەردى بەرىپ جاتىرمىز. ادام ءۇشىن باسپانا ماسەلەسىنىڭ ماڭىزى زور. ءۇيى بار ادامدار بولاشاققا ۇمىتپەن قارايدى. بۇل 4-ساناتتاعى ساپاسى جاقسى پاتەرلەر. ءبىراق ينفراقۇرىلىمى جاعىنان مۇمكىندىكتەرى تاماشا»، - دەدى باۋىرجان بايبەك.
اكىمدىكتىڭ حابارلاۋىنشا، 2017-جىلدىڭ سوڭىنا دەيىن 4,5 مىڭ پاتەر پايدالانۋعا بەرىلەدى. وسىلايشا جىل سوڭىنا دەيىن كەزەكتە تۇرعان ءار ءتورتىنشى وتباسى باسپانالى بولادى. 2017-جىلعى مالىمەت بويىنشا، باسپانا الۋعا 20300 ادام كەزەكتە تۇر.
قالا اكىمى اتالعان اۋماقتا ورنالاسقان مەديتسينالىق ورتالىق پەن «Nomads» مەيرامحاناسىن دا ارالاپ كوردى.
ايتا كەتۋ كەرەك، اتلەتتەر اۋىلى 2016-جىلدىڭ سوڭىندا سالىنىپ بىتكەن بولاتىن. 23 گ ا اۋماقتا 14 تۇرعىن ءۇي بار. كەشەن ايماعىندا ح ق ك و، ەمحانا، سۋپەرماركەت، بانك، پوشتا ورنالاسقان.
