نۇرسۇلتان اۆستريادا جەڭىس تۋىن جەلبىرەتتى

قىزىلوردا. قازاقپارات- جاقىندا اۆستريانىڭ لەيبنيتس قالاسىندا دزيۋدودان جاستار اراسىندا ەۋروپا كۋبوگى ءۇشىن جارىستار ءوتتى.

وسى ءدۇبىرلى دوداعا ەل نامىسىن قورعاۋعا قازاقستان جاستار قۇراماسى اتىنان 30 سپورتشى اتتانسا، ولاردىڭ اراسىندا سىرداريا اۋدانىنان نۇرسۇلتان سەرالى دە بار، دەپ حابارلايدى قازاقپارات.

60 كەلى سالماقتا سىنعا تۇسكەن جەرلەسىمىز ەۋروپادا توپ جارىپ، تۋىمىزدى جەلبىرەتتى. 1997-جىلى بەسارىق اۋىلىندا دۇنيەگە كەلىپ، جالاڭتوس ءباھادۇر اتىنداعى سپورتتا دارىندى بالالارعا ارنالعان مەكتەپ-ينتەرناتىندا قازاقستاننىڭ ەڭبەك سىڭىرگەن جاتتىقتىرۋشىلارى قالەن قالي ۇلى مەن ريشات بۋرلوۆتان ءتالىم العان نۇرسۇلتان بولاشاعىنان ءۇمىت كۇتتىرەتىن سپورتشىلاردىڭ ءبىرى.

ايتا كەتەيىك، وتكەن اپتادا وتكەن ەۋروپا كۋبوگىندا قازاقستاندىق قۇرامانىڭ مۇشەلەرى بارلىعى ەكى التىن، ءبىر كۇمىس جانە ەكى قولا مەدالدار جەڭىپ الدى. باسەكەگە الەمنىڭ 28 ەلىنەن 500 دەن استام سپورتشى قاتىستى.