ەلباسى قۇقىق قورعاۋ ورگاندارىنا ەكسپو اشىلۋىنداعى جۇمىسى ءۇشىن ريزاشىلىق ءبىلدىردى
كەزدەسۋ بارىسىندا مەملەكەت باسشىسىنا 2017-جىلعى بەس ايدىڭ قورىتىندىسى بويىنشا ەلدەگى قىلمىستىق احۋالدىڭ جاعدايى تۋرالى ەسەپ بەرىلدى.
نۇرسۇلتان نازاربايەۆ قۇقىق قورعاۋ ورگاندارى جۇرگىزىپ وتىرعان شارالاردىڭ ناتيجەلەرىنە توقتالىپ، ازاماتتاردىڭ قاۋىپسىزدىگىن قامتاماسىز ەتۋ جونىندەگى جۇمىستىڭ ساپاسىن جاقسارتا بەرۋ قاجەتتىلىگىن اتاپ ءوتتى.
«جالپى، جاعداي جاقسارىپ كەلەدى. قىلمىس جاساۋ 16 پايىزعا ازايدى. ولاردى اشۋ كورسەتكىشى 60 تان 70,2 پايىزعا كوتەرىلدى. 26 مىڭ ادامعا راقىمشىلىق جاسالىپ، 1200 ادام باس بوستاندىعىنان ايىرۋ ورىندارىنان بوساتىلدى»، - دەدى قازاقستان پرەزيدەنتى.
ىشكى ىستەر ءمينيسترى حالىقارالىق «ەكسپو-2017» مامانداندىرىلعان كورمەسىن وتكىزۋ كەزىندە استاناداعى قۇقىقتىق ءتارتىپتى قامتاماسىز ەتۋ بارىسىندا قابىلدانىپ جاتقان شارالار تۋرالى بايانداپ، ىشكى ىستەر ورگاندارىنداعى رەفورمالاردىڭ ناتيجەلەرى جونىندە ايتتى.
ەلباسى حالىقارالىق «ەكسپو-2017» مامانداندىرىلعان كورمەسىنىڭ اشىلۋىندا ءتيىستى قاۋىپسىزدىكتى قامتاماسىز ەتكەنى ءۇشىن قۇقىق قورعاۋ ورگاندارىنىڭ بارلىق قىزمەتكەرلەرىنە ريزاشىلىق ءبىلدىردى.
«كوپتەگەن مەملەكەتتەر باسشىلارى مەن قوناقتار قاتىسقان «ەكسپو-2017» كورمەسىنىڭ اشىلۋىندا قاۋىپسىزدىكتى قامتاماسىز ەتكەن ەلىمىزدىڭ بۇكىل پوليتسيا قىزمەتىنە، ۇلتتىق قاۋىپسىزدىك كوميتەتىنە، «سىربار» سىرتقى بارلاۋ قىزمەتىنە جانە باسقا دا ورگاندارعا العىس ايتامىن. ءبىز كورمەنىڭ اشىلۋىن ۇيىمشىلدىقپەن وتكىزدىك»، - دەدى مەملەكەت باسشىسى.
نۇرسۇلتان نازاربايەۆ مۇنداي ءىس-شارالاردى وتكىزۋ كەزىندە قاۋىپسىزدىكتى قامتاماسىز ەتۋدىڭ ايرىقشا كۇردەلى ماسەلە ەكەنىنە توقتالىپ، بارلىق قۇقىق قورعاۋ ورگاندارىنىڭ جۇمىسىن جوعارى باعالادى.
«استاناعا وبلىستاردان ادامدار جىبەرىلدى. وفيتسەرلەردىڭ بارلىعى بەلگىلەنگەن ورىندارىنان تابىلا ءبىلدى. ءارقايسىسى وزىنە تاپسىرىلعان ىسپەن اينالىستى. بارلىق سالادا دا كاسىبيلىكتىڭ جوعارى دەڭگەيى قامتاماسىز ەتىلدى»، - دەدى قازاقستان پرەزيدەنتى.
كەزدەسۋ سوڭىندا ەلباسى ءبىرقاتار ناقتى تاپسىرما بەردى.
