ەكسپو قوناقتارىن قازاقتىڭ كادەسىيلارى كوبىرەك قىزىقتىرادى-فوتو
بۇل تۋرالى «قازاقپارات» ح ا ا تىلشىسىنە «Asian Nomads» ارت- ديرەكتورى ەرنار نۇرماعامبەتوۆ ايتىپ بەردى.
ەرنار نۇرماعامبەتوۆ بالا كەزىنەن مۇسىنشەلەر مەن مينياتيۋرالاردى جيناۋمەن اينالىسقان جانە قازاق باتىرلارىنىڭ مۇسىنشەلەرى جوق ەكەنىن اڭعارعان. ءدال وسى وي ەرناردى شىعارماشىلىققا جەتەلەپ اكەلگەن. العاشىندا ونىڭ كومەكشىسى ينتەرنەت بولدى، كەيىنىرەك كوركەمسۋرەت بويىنشا تانىمال شەبەرلەردەن ساباق العان. قازىرگى ۋاقىتتا ەرنار نۇرماعامبەتوۆتىڭ توبىندا 6 شەبەر جۇمىس ىستەيدى. ونىڭ ارسەنالىندا اسكەري توپتاما، «قازاق حاندىعى»، باقسى، بۇركىتشى، اجە بەينەلەنگەن ەتنيكالىق توپتاما بار.
«ءبىزدىڭ كادەيسىي بازارىمىز ادام كوپ جۇرەتىن ورىنعا قويىلعان جانە تۋريستەر ۇلتتىق كيىمدەگى قىزدىڭ ءمۇسىنىن كوپتەپ ساتىپ الۋدا. ءتىپتى، مۇسىنشەلەردى قۇيىپ ۇلگەرمەي جاتىرمىز»، - دەيدى ە. نۇرماعامبەتوۆ.
«ءار مۇسىنشەنىڭ ءوز كەمشىلىكتەرى بولۋى مۇمكىن، كەيبىر قالىپتاردى رەسەيدەن تاپسىرىسپەن الدىرامىز، ءبىراق كوپشىلىگىن ءوزىمىز جاسايمىز. كىشىگىرىم مۇسىنشەلەردى جاساۋ اسا قيىن پروتسەسس. نوبايىن ازىرلەپ، ءمۇسىنىن قۇيۋ، بوياۋ سەكىلدى بارلىق جۇمىستاردى ءوزىمىز اتقارامىز»، - دەدى ول.
استانادا جاقىندا عانا اشىلعان ارباتتا قولونەر شەبەرلەرى ءمۇسىندى بوياۋ بويىنشا تەگىن شەبەرلىك سىنىپتارىن جۇرگىزۋدە. ەرناردىڭ ايتۋىنشا، حالىق شىعارماشىلىعى ادامعا وڭ ىقپال ەتەدى، سابىرعا شاقىرادى، تاريحتى، ءداستۇردى بىلۋگە دەگەن ىنتانى وياتادى.
«ءمۇسىندى جاي عانا بوياۋ مۇمكىن ەمەس، ونىڭ ءتۇسىن، كيىم- كەشەگىنىڭ ەرەكشەلىگىن ءبىلۋ ماڭىزدى. سول ساتتە ادام اۆتوماتتى تۇردە تاريحتى زەردەلەپ، بارلىق كوستيۋمنىڭ ەرەكشەلىكتەرىن بىلەتىن بولادى»، - دەدى ول.
ونىڭ ايتۋىنشا، ونىمدەردىڭ باعاسى اسا قىمبات ەمەس، قولجەتىمدى. استاناعا كەلگەن ەكسپو قوناقتارى «Made in Kazakhstan» كادەسىيلارىن كوپتەپ ساتىپ الىپ جاتىر.
«ءبىر جىگىت گەرمانيادان كەلگەن تانىسىنا بازارلىق ساتىپ الدى. شەتەلدىك دوسىنىڭ تامسانعانىن كورىپ، وزگە دە تۋريست دوستارىنا كادەسىيلار الىپ كەتتى. تۇركيالىق قوناق تا ءوز دوستارىنا كورسەتسە كەرەك، تۇتاس تۇركيالىق دەلەگاتسيا كەلىپ، مۇسىنشەلەرىمىزدى الىپ كەتتى»، - دەيدى ەرنار نۇرماعامبەتوۆ.
ەسكە سالا كەتسەك، 11- ماۋسىم كۇنى استانادا ارباتتىڭ رەسمي اشىلۋ ءراسىمى ءوتتى. استانادان اربات اشۋ تۋرالى باستاما كوتەرگەن اراي وردابايەۆا بۇل ورىندى ءتۇرلى شەبەرلەردىڭ، سۋرەتشىلەردىڭ، كوشە مۋزىكانتتارىنىڭ ورداسىنا اينالادى دەپ ۇمىتتەنەدى. يدەيانىڭ قالاي تۋعانىن، قالاي جۇزەگە اسقانىن ءبىلۋ ءۇشىن اراي وردابايەۆانىڭ قازاقپارات اگەنتتىگىنە بەرگەن ارنايى سۇحباتىن وقىڭىزدار.
اۆتور: ايجان سەرىكجان قىزى
