جازۋشىنىڭ ۇلىنا جازعان حاتى
استانا. قازاقپارات - جازۋشى، تۇركولوگ- عالىم نەمات كەلىمبەتوۆتىڭ « ۇلىما حات» ەسسە پوۆەسى بارشا قازاق ۇلىنا قاراتىپ ايتىلعانداي اسەر قالدىرادى.
اۆتوردىڭ ءوزى ءبىر سۇحباتىندا «ءبارىمىز جابىلىپ زاماندى كىنالايمىز. وعان كۇشىمىز جەتەدى. ءبىراق سەنىڭ الدىڭدا ءوزىمدى اقتاپ الۋعا دارمەنسىز سەكىلدىمىز. ال ءوز اكەسىنىڭ الدىندا قاسيەتتى پارىزىن وتەي الماعان ادام ءوز بالاسىنا وسيەت ايتۋعا قۇقى بار ما؟ » - دەپ وقىرمانعا كۇردەلى ساۋال تاستايدى. راسىندا، مۇنىڭ جۇگى اۋىر. بۇگىنگى بالا بولاشاق اكە ەكەنى داۋسىز شىندىق. ال، سول بالامىزعا قانشالىقتى ءتالىم- تاريبە مەن ۇلتتىق سانانى سىڭىرە الامىز؟ مۇنىڭ ۇددەسىنەن شىعا الدىق پا دەگەن سۇراققا ويلانىپ قالۋىمىز عاجاپ ەمەس. جازۋشىنىڭ وسىناۋ جان تەبىرەنتەر حاتىن وقىپ، ءبىر ءسات ويلانىپ كورەيىك.
... بۇركىت كوپ ءومىر سۇرەدى، ءبىراق ول ءوزىنىڭ ۇزاق ومىرىندە ۇيادا جاتقان بالاپانىن نەبارى ءبىر رەت قانا ۇشىرىپ ۇيرەتەدى. ەندى عانا تەمىر قانات بولىپ كەلە جاتقان بالاپانىن بۇركىت تىستەپ العان كۇيىندە كوز جەتپەس اسپان تۇڭعيىعىنا سامعاپ ۇشىپ شىعادى دا، كەنەت اۋزىنداعى بالاپانىن تومەن قاراتا لاقتىرىپ جىبەرەدى. ءالى ءبىر رەت تە قانات جازىپ، ۇشىپ كورمەگەن ءوز بالاپانىن ايامايدى ەكەن - اۋ دەپ قالاسىڭ. ءبىراق قاس - قاعىم ساتتە ءالسىز قاناتتارىن اشۋعا شاماسى كەلمەي، جەرگە قاراي قۇلدىراپ بارا جاتقان بالاپانى سوڭىنان انا بۇركىت قۇيىنداي اعىپ كەلەدى. ەگەر بالاپان جەرگە جاقىنداعانشا قاناتىن اشا الماسا، وندا انا بۇركىت ءشۇيىلىپ كەپ ونى قاعىپ الادى دا، قايتادان بيىك شىڭ باسىنداعى ءوز ۇياسىنا اپارىپ قويادى. ءبىراق انا قىران شەكسىز اسپان الەمىندە ءوز كۇش - قۋاتىمەن بىردەن سامعاپ كەتە الماعان تەمىر قانات بالاپانىنا قايتا مويىن بۇرىپ قارامايدى ەكەن. ەندى الگى بالاپان ءوزىنىڭ جەر باۋىرلاپ جۇرەتىن جىلان ەمەس، اسپان الەمىندە قۇيىنداپ ۇشاتىن قىران ەكەنىن تەك ءوز قايراتىمەن، ەرىك - جىگەرىمەن عانا دالەلدەي الادى. ەگەر وعان رۋحى جەتپەي قالسا، وندا قايىرىمسىز قاناتتارىنا قارعىس ايتىپ، ءۇن - ءتۇنسىز مىنا جارىق دۇنيەمەن ماڭگىلىككە قوشتاسادى ەكەن.. . ءومىر سۇرگىڭ كەلسە - ءوز بەتىڭمەن تىرشىلىك ەتۋدى قازىردەن باستاپ ۇيرەن. ءومىر اسپانىندا ءوز قاناتىمەن ۇشا الاتىن قىران ەكەنىڭدى بالاپان كەزىڭدە كورسەت. مەن سەنى ساقالىڭ شىققانشا سۇيرەي بەرمەيمىن. جەتەلەگەن ءيت اۋعا جارامايدى. ءوز ارەكەتىڭدى ءوزىڭ جاسا.. .
Massaget.kz